初七人日,人人生日,祝各位龍年行大運,年年有餘。年初二飲茶,買了份號稱公信第一報紙,標題為「玄學家測股樓等同擲毫」,一條阿媽係女人的題,要選今年最無聊A1新聞,這則可以入圍。誰都知道風水佬呃你十年八年,就算睇嘅人,大部份知道迷信沒有科學根據,姑且抱着一看無妨心態,殊不知有記者居然將此科學數據化,真係堅無聊。
簡單描述該則報道,記者翻查過去5年三位風水佬對股市、樓市預測,然後秋後算賬,得出的答案是命中率「僅」五成。五成高唔高,真係見人見智,股榮覺得應該公平一點,找來外資大行、基金經理等專業人士比併,不比還好,一併之下原來舊年俾風水佬老點,點都好過大行分析員、芬佬甚至財演「專業」預測。
去年港股埋單收報18434點,全年勁跌20%,高位為4月24468點,但環顧歐美大行預測,年底目標介乎25500至32000點,年中多間大行亦紛紛調低目標,但與年底相距仍達三成之多,認真你就輸了!名牌大行不代表準,再數多前一年,兩大投資銀行高盛及摩根士丹利,2010年初估恒指10年底見27000點及26193點,結果當年港股收23035點,為眾大行中最差。
4個風水佬3個估中股市調整
相反四位風水佬,去年除李丞責錯得最離譜外,其他三位都占卜到下半年大市有暗湧要調整,大家醒水沽貨的話,可以避過一劫。
大行分析員向來薪高花紅肥,對企業盈利、宏觀經濟掌握最為透徹,每份報告長達數十甚至百頁紙。據了解,如非行內人士,每份報告街外客收費動輒千美元,但結果竟不如55蚊一本的風水書,有關股樓篇幅最多數十頁,外行人贏內外人,算是另一經典之作。
去年初留意一篇報道,人稱蘇師傅的蘇民峰於03年沙士以300萬元發迹,轉眼7年間,身家已暴漲100倍,資產升值至3億元,買樓炒股成為致富關鍵,老本行睇風水變成副業。因此,我相信風水佬炒股應該有一手,起碼不是紙上談兵,實戰經驗多過分析員幾條街。
常言道︰一命、二運、三風水,命好當然最好,唔好就等運到,再唔係寄望風水助力。但投資股票不能單靠命運或風水,亦不可關在「象牙塔」裏計死數,去年下半年大市開始急回,分析員未有狠降目標,其一是等運到,以為中國會放水,最後當然得個桔,其次是㩒來㩒去,股票估值平到笑,於是賴跌入價值投資陷阱。另邊廂,大行仍然話估值平、增長勁,但今年恒指預測目標卻大降至最多二萬二點,明顯淆晒底,因此股榮寧信風水佬,都唔信分析員。
股榮