豬狼對決日日互片，但阿爺一日未吹雞，好多小圈子選委都仲係唔敢公開表態住。「電訊魔童」王維基（圖）係資訊科技界選委，有份投票選特首，佢噚日同八方透露，豬同狼最近都有搵過佢，例如發吓短訊、電郵咁，但因為兩位候選人未出晒政綱，所以佢呢一刻仲未有心水。
佢話自己認識龍豬唐好多年，因為唐唐當年未做財爺之前，係工商及科技局局長，經常要同佢哋電訊商有接觸，所以都算得上係深交。反而同CY就冇咁熟絡，咁多年嚟只係見過呢位前行會召集人兩、三次面，但魔童補飛話，自己揀特首，唔會因為同對方熟啲就揀邊嗰，最緊要都係睇對方係咪合適人選喎。