狼振英前日開始一反常態，點名狂砌對手唐豬後，噚日落區荃灣家訪更變本加厲，落手落腳表演如何用豬肉做餃子。
狼生期間包生豬肉入麪皮嘅手勢異常純熟，山東人包餃子梗係熟手，佢話細細個已經包慣，唔似唐豬學拳咁，幾年前至開始。狼振英話，細細個己成日幫阿媽做家務，「阿媽識做嘅，我基本都識做，當然水準唔太一樣」。
受訪家庭要拆嘢
狼振英透露細個時，已經好拿手整麪皮，令到做餃子塊麪皮多番啲層次，自家製作嘅麪皮，同街買嘅不能相提並論，「入口會好食啲」。佢又話隻餃子由於加咗韮菜，所以唔可以擺好耐，否則會出水，一放落水煮即爛。雖然講得頭頭是道，但由於選舉規例，規定選舉期間不能贈飲贈食，所以狼生一隻餃子都冇食過就走。
狼振英到訪嘅荃灣二陂坊一向治安麻麻，狼來了前個多小時已有近十名便衣警察到場戒備。狼振英到訪基層屋企，為方便電視台拍到佢表演山東手藝包餃子一幕，受訪單位基層住戶更先要將花園露台個木櫃搬走，政客做騷，勞師動眾，在所難免。