姚樂怡早前被本報踢爆今年將與拍拖8年的圈外男友吳俊匡（Alan）結婚，前晚樂怡與Alan在中環影婚紗相，並正式宣佈婚期。樂怡說Alan是圍村人，Alan爺爺更開口催生仔，令她感到有壓力。
姚樂怡與未來老公吳俊匡前晚在中環一間酒吧拍攝婚紗相，於在場記者要求下，Alan即場錫了樂怡臉珠一啖，甜蜜滿瀉。
爺爺恨曾孫
戴上鑽戒的樂怡一臉幸福，她透露婚禮已定於今年4月26日舉行，並會在RitzCarlton酒店擺35至40圍宴請親朋，樂怡說：「6月26號係我哋嘅拍拖周年紀念，但Alan唔想太遲，所以提早啲。」問樂怡是否奉子成婚才急着結婚，她笑說：「Alan係圍村人，佢爺爺見到之前報道話我有咗即好開心話『係就好』，其實我只係肥咗，好彩佢啲唐兄弟生咗BB，可以頂住先。其實我就鍾意女，老公話冇所謂，但都唔一定要生龍B。」
樂怡還透露Alan在日本的求婚過程：「去年6月同獎門人去大阪拍嘢，Alan帶埋個識日文嘅朋友飛過嚟搵我，仲喺iPad整咗啲相，串連埋就係『Iloveyou！Willumarryme？』之後向我求婚，好感動。」
日本影靚相
對於被好姊妹文頌嫻爬頭出嫁，樂怡說：「我計劃結婚先過佢，大家嘅姊妹團都差唔多，有佘詩曼、梁靖琪同張文慈等。」她表示4月將赴日本拍攝櫻花景的婚紗相，希望留下美好回憶。
採訪：溫敏芝
攝影：陳慧安