「點樣擺甫士，都有你嘅事。點樣先君子，都會變錯事。」這不只是金曲《Chok》的歌詞，也是林峯的心聲。去年林峯在演藝事業取得驕人成績，偏偏被舊愛潘霜霜拖垮；獲無綫頒金曲金獎，但卻有人狂插他chok不起，好像做甚麼事也事倍功半。猶幸林峯由入行開始，已習慣接受批評，他認為最重要是做好本份，他相信假以時日，其作品必定有人欣賞和認同。 撰文：黃曉妍
林峯今年繼續歌、影、視三棲發展，他坦言要加倍努力，做好呢份工，做好每個角色。去年，林峯在感情和事業上都遇到挫折，他直言身心的確感到有點累，但亦令自己成長不少，對他而言也是好事：「我唔會睇得太負面，我鍾意去發現、觀察、睇光明嘅一面，因為喺工作上、生活上，有太多嘢未必係你想像咁，未必完全如意，尤其係我哋演員，以演戲嚟講，拍一套電視劇，一日拍十幾場戲嘅話，如果你因為一兩場戲失準，表現未如理想，因而心情低落，打後每場戲都會越做越衰。所以演員起碼要識一樣嘢，就係收拾心情，因為之後要面對嘅嘢會更多。」
唔使討好全世界
至於潘霜霜和金曲金獎事件，對林峯有甚麼大影響？他說：「我由07年攞新人獎，俾人講到家，喺演藝上，我由入行到家十幾年，年年都有嘢俾人講。」
雖然林峯獲得很多fans支持，但他的努力仍被有些人否定，最終是吃力不討好，林峯說：「我覺得唔會，由我入行第一日已經知道，如果肯接受我，肯睇我做過啲乜嘅人，只要我做好本份，佢哋已經睇到。如果唔願意接受，就算我講再多，或者做再多，佢哋永遠都唔會睇，唔緊要㗎，我做嘅嘢唔係要討好全世界，係要對得住我身邊嘅人、屋企人同肯睇我嘅人，咁已經足夠。我一直都堅持呢個理念，因為成日計住度住，不如將精力做好自己本份先，唔好理其他唔關事嘅嘢。」
由入行至今，林峯不停面對別人批評，慶幸是懂得調整自己：「好慶幸我身邊有班好錫我嘅朋友、同事同fans，因為我嘅開心好難源自自己，我開心係源自我身邊嘅人，我係個好受人影響嘅人，其實係個循環。如果我唔開心，我身邊愛錫我嘅人都會受我影響，而我喺佢哋身上亦會被佢哋感染番。所以我首先要令自己平衡，起碼令身邊嘅人可以將正能量再帶畀我。」問到去年有甚麼事情是最開心或最不開心？他說：「喺工作過程上實有好多唔同意見，或者有好多壓力，好多自己想做嘅嘢，好想表達嘅嘢，要經過一段努力先爭取到，但工作上，我都已經覺得好滿足。」
接受意見再改進
從批評中成長的林峯謂，要清楚自己做甚麼，如聽到不同意見，要看看哪些意見可行，對自己有幫助。是否只接受善意批評？他說：「唔可以咁講，我會接受我能力範圍內而我可以做到嘅嘢，因為大家崗位唔同，大家先會知道身在其位有乜難處，所以我會盡我能力，做我家可以做到嘅嘢，總之每一年都會繼續努力。」
化妝：RaymondYip
髮型：DY@HairCulture
場地：TheONE
感激父母信任
林峯父親林華國是廈門著名地產商，有「廈門李嘉誠」之稱，林華國一直很緊張兒子在演藝事業上的成績，問林峯其父有否讚過他？他說：「佢哋對我好放心，好相信我喺任何情況下都撐得住，亦知我目標好明確，冇人會比得上自己父母更了解自己，佢哋當初放心俾我選擇呢行，就係為咗呢樣，就係俾我有經歷，俾我有成長。」
一直忙於工作的林峯，犧牲了不少與家人相處的時間，於是他在聖誕節和農曆新年都沒接工作，返家鄉廈門跟家人過節，他說：「父母年紀開始大，我又越嚟越忙，但最重要係屋企人，如果忙到連屋企人都見唔到，咁我出嚟捱世界、出嚟搏做乜呢？辛苦得嚟冇意思。」
讚爸爸廚藝勁
今年是林峯首次跟外甥仔一起度歲，身為舅父的他說會送玩具給外甥：「我會送架車畀佢，等佢1歲可以玩。」提到農曆年習俗，林峯說爸爸會負責煮大餐，還會製作已失傳的「姑婆果」：「老竇好鍾意煮嘢，佢細個嘅時候，食過佢姑婆整嘅姑婆果，係用糯米整嘅糕點，入面有香菇、瘦肉同蝦米，要切成一片片炸，因為姑婆整，所以叫姑婆果，家已經失傳，但老竇研製番出嚟，我覺得味道改良咗，好好食，每年老竇會整好多，個個親戚都嚟攞。」林峯坦言想跟爸爸學整姑婆果，然後將之一代傳一代。
拍楊家將覓得兄弟
雖然歌、影、視三棲發展，但林峯在影圈仍是初哥，他坦言對電影充滿憧憬：「對我嚟講，電影好新鮮，無論人同事都令我好好奇，好想學多啲嘢，想再進步。我好幸運，呢兩年遇到大型製作同導演，包括《白蛇傳說》同《忠烈楊家將》等。《忠》片嘅7位兄弟仲真係做咗兄弟，大家都估唔到7個男仔，一有時間就約食飯，鄭伊健都話入行咁多年，未試過同一個劇組嘅一班人食咁多次飯，佢話好好玩，大家都清楚要做乜，都抱住學習心態。」
目標清晰
至於音樂方面，林峯透露正灌錄全新廣東大碟，年中推出國語碟，年尾再出另一張廣東碟及舉行個唱。他說每年的目標，是希望歌影視的作品有人欣賞及認同。問林峯有否想過自己搞製作公司？他說：「希望有呢日，見有啲藝人朋友有公司，佢哋雖然可以控制好多嘢，但相對地，要理嘅嘢又多咗。好多年前有人搵我做幕後製作，但我冇咁嘅時間，又冇足夠能力。有人問我將來會唔會自己作曲、填詞、或者做導演，我話唔會，因為我好清楚每樣嘢都係專業，我呢個崗位都係專業，我專注咗呢樣嘢，呢樣嘢已夠我學一世，既然有咁好嘅團隊同人才，做乜唔畀大家發揮所長？」