蘋機會：300萬豪GAME　12人爭拉頭馬

有人用300萬港紙買名車、洋樓、遊艇，但如果話俾你知用呢筆錢買咗部遊戲機，相信大家都會同我一樣，除咗O嘴之外，一定仲想見識下部機有咩把炮。各位觀眾，有請全港得3部、出自遊戲「世嘉」嘅《StarHorse3》。

撰文：小米高
攝影：周旭文
Model：Rita@GME

畫面華麗真實感強

賽馬育成遊戲《StarHorse3》係《StarHorse2FINALDESTINATION》嘅繼承作，玩家可以一嘗做馬主嘅滋味，並以贏取各大盃賽為目標，詳細玩法一陣再講，先解構下部機豪喺邊度。新機矜貴地方係動用咗8個芒組成，包括3部67吋DLP屏幕及5部32吋LED芒，以超大畫面配合成個人咁高嘅環迴喇叭，營造出高清實感以及無敵氣勢。

■玩家可以一嘗做馬主嘅滋味，並以贏取各大盃賽為目標。

Oh...Seat!　貴氣之座

另外，整座系統容納到12人同場較量，每個Seat位都好巴閉，不但有獨立32吋TouchScreen，角落擺位一個掣就可以自動調校，迎合玩家不同坐姿視線；最離譜係個座位舒適唔在講，設計上亦好鬼變形金剛，單人位可以變成雙人情侶孖座，爭在未有按摩功能!

■贏了獎金可以用銀行機入起。

插卡驗手指

遊戲系統用Aime卡進行（與KONAMI的e-AMUSEMENTPASS類似），但進化之處係完全唔需要入錢（代幣），以儲值方式配合專用銀行系統嚟玩，係街機上一大突破。為保障用家「財產」，每次玩不但需要入密碼，更要用手指作脈衝偵測，嚴謹程度勁過一般e-banking。
模式方面分「主副」賽事，主賽事玩家將會與其他玩家對決，副賽事方面就係單挑電腦，WBC、SWBC有齊，而世界超級騎師大賽改由JOCKEY'SGRANDPRIX以及HORSEMAN'SGRANDPRIX代替，前者與世界超級騎師大賽一樣，挑選成績良好的騎師，後者可以自由報名，經三場比賽後，就會進入決勝戰，勝出可獲1,000分。賽程表亦新增雌馬限定賽事，令賽事更為真實。
當然出賽前要養馬仔，需不時餵飼及同佢玩，以保持最FIT狀態。如果玩馬悶的話，可以用娛樂場的小遊戲打發時間，仲可以獲得獎金以及馬匹。