八方同事早排求為政客往黃大仙求靈籤，幫喺兔年慧劍斬情絲嘅公民黨Tanya陳淑莊向黃大仙問姻緣，得出60號中籤，指佢今年有望愛上老外。噚日八方見到陳淑莊，當然追問支籤靈唔靈，識咗外國男朋友未？Tanya就搞笑話自己其實一向識好多外國人，黨友司馬文係其中一個，可惜，男朋友就未有。
上次因為八方狂想曲幻想佢龍年結婚，結果搞到晨咁早畀陳媽媽電話追問搞邊科嘅Tanya，噚日坦言陳媽媽年初一亦曾就佢今年將「愛上老外」一事發表評論，但Tanya就話吸取上次經驗，今次不便分享陳媽媽高見。
會做埋激光矯視
雖然Tanya叫八方唔使再幫佢徵婚，話費事搞到佢好似好「猴擒」，仲話：「有就有，冇就冇，冇計啦！」但原來Tanya早前亦忍唔住手，上網翻查八方同事幫佢求嗰支籤，話解籤同報道中解籤佬講嘅有啲唔同。根據Tanya所睇的黃大仙靈籤網站，有關姻緣有兩句：「雖然對方屢次主動示愛，但仍要考驗其誠意。」當中有冇乜嘢玄機，真係要Tanya自己至知。
講起人緣，Tanya換過一頭短髮後，除咗唔少男fans劣評，高登亦有唔少巴打話要Tanya留番長髮，12年先會再投佢一票。Tanya原來對此亦略有所聞，「高登鬧到飛起，我知吖，不過高登大部份都係男士」，話相信網民講笑居多，選議員主要睇能力同理念，表明將會繼續捍衞短髮造型，稍後更會做埋激光矯視，令「四眼陳」綽號成為歷史，「我都曾經係少女，都已經成為咗歷史的一部份」。
至於點解突然咁鍾意短髮，Tanya就話主要因為自己已恨咗好多年，「同埋同我性格吻合啲」，自爆「最近開始撞到啲男仔話我好睇」。睇嚟黃大仙支籤靈唔靈，好睇有幾多男人有足夠誠意，真心鍾意陳淑莊個短髮look。
mailto:[email protected]