「疑似」劉迺強不知何許人也，寫下一篇唐英年勾結美英勢力的「財外聯盟」，點名指責幾位傳媒人為「唐營大腦」（由陶傑、鄭經翰至成名、劉銳紹、鍾庭耀），「手腳」是陳慧兒，教人摸不着頭腦。如果唐英年醒目到咁，佢就唔會俾人侮辱為豬啦。
凡有競爭性選舉，姑勿論選民有多少，少不免有駡戰、抹黑、唱衰等等事情出現。台灣有一千四百餘萬人投票，投票前藍綠兩營互相抹黑之事，未見過咩？美國共和黨總統候選人競選，挖舊賬之事更令人嘆為觀止，但無論點樣，抹黑點都有若干事實根據（如感情缺失，如金里奇與第一任太太離婚之醜惡過程），夾硬嚟，憑空構思出來之「勾結美英勢力的財外聯盟」則是太過離譜，抹黑抹到呢個程度，令人諗起唐梁兩位小學時代，流行「凌波舞」，卓比仄架之名曲「凌波樂與惡」（LimboRock）有一句，howlowcanyougo？
凡有競選，必定要討好選民，否則冇票。美國總統奧巴馬上次獲選，荷李活明星為佢籌款，工會為佢提供選票，功勞不少，但今年一開始，奧巴馬不惜得罪石油工人工會、影視、印刷、媒體工會、荷李活大亨，否決咗興建油氣運輸管（由加拿大至德州），反對美國參眾兩院推出之「反網上盜版法」，令到工會與石油大亨、影視界大亨及新聞大亨，非常不滿，唔通奧巴馬傻咗，竟然與金主與票主作對？非也，奧巴馬幕僚做過選票計算，籌款計算，認為反對盜版法與禁建油氣管，可以明益IT界，討好環保界及環保人士，為自己打造一個前衞，先進，新經濟體系保衞人嘅形象，今年會取到更多捐款，更多選票，故此一腳踢走舊經濟人物，昨日之擁躉係今天之陌路人，誰是敵人，誰是朋友，在競選年，日日都唔同。香港真正有權之人，就係特首，特首有真正「角逐」，只在今年發生，雖則選民只有1200個，左丁山冇份，但係如上述要角逐選票，無論多少，選民就是寵兒，民建聯/工聯會係擁有最多選票嘅同路線政治集團，睇陳婉嫻之專欄文章，大家都可以估得到邊一位會係佢嘅寵兒啦。