台灣魔術師劉謙成功媾掂模李蘊，追女夠到家，不過日前大除夕佢喺中央電視台春節晚會上表演魔術時，竟然喺約13億觀眾面前失手穿崩，佢構思成個月嘅新魔術《幻鏡》，網友花5分鐘就破解咗，仲質疑劉謙喺枱下面收埋塊鏡，透過折射原理，根本枱底就係收埋咗個人。
拉周杰倫落水
被網友拆解咗魔術，劉謙前日喺台灣現身回應：「魔術是表演藝術，我不是在出謎語讓大家猜。目前為止，沒人說對，上節目前就預料過會有集體動腦事件。」
劉謙嘅春晚鏡中飲咖啡魔術，仲俾網友篤爆之前喺日本表演過，劉謙死撐拉埋周杰倫落水，話佢都唔會一首歌只係唱一次。
觀眾要求多多，劉謙話：「壓力很大，給自己78分，因為太緊張了，這次有點笑不出來，若現場有問題，就完了。」講到結婚，被爆同李蘊拍拖、35歲嘅劉謙就話：「40歲才考慮結婚，若結婚了等於半退休。」