「睇住佢一層變兩層，兩層變三層，仲嚴重過丁屋，實在太離譜！」提供照片的深井居民對近年深井新村「發展」十分不忿。身兼荃灣區區議員、經營陳記燒鵝的家族成員陳偉明在深井寮屋區長大，他歸究地政總署執法不力：「政府對寮屋態度好唔清楚，以前就話要減少寮屋數目，家又無晒聲氣。地政會搵人巡，但係見到有問題最多都係出封警告信，好少有懲罰性行動，村民咪越嚟越大膽，試佢底線囉！」
村民博懵加建租售
他指寮屋要修葺必須向地政總署申請：「有一個可容忍的高度限制，以前係11呎，之後加到14呎，不過兩層都掹掹緊，無可能起三層！」修葺亦必須沿用原來的建築物料，「除非你證明白蟻太嚴重，唔可以起木屋啦」。該村不少年輕一代不願住寮屋，遷出後老人家會間房出租，村民紛紛「博懵」加建租售。
不過，寮屋的存在並非純粹「非法霸地」的結果。寮屋由來追溯至五、六十年代，當時大批內地難民湧港，自行搭建鐵皮屋或木屋自住，成為今日的寮屋。1982年政府為全港寮屋登記，仔細紀錄每間屋的面積、高度、建築物料等資料，寮屋此後必須保持與地政總署的紀錄相符，否則政府清拆寮屋時會喪失安置資格；登記後新建的寮屋均屬違法。
《蘋果》記者