新年假期好多人外遊未返歸，自由黨田少（圖）據講去咗遊埠，此行仲有特備節目，就係驗身。田少早前意外跌親個頭，之後手尾幾長，影響到視力，田少遍尋名醫，又有國內高人幫佢針灸，更遠赴美國求診，情況有好轉。
由於今年係選舉年，田少會唔會再戰江湖，去馬直選，據說取決於佢身體狀況，知情人士話田少對出山好有決心，不過佢太太卻着緊其健康，擔心競選時壓力大又頻撲，影響健康就冇必要啦，因此田少趁農曆年外遊時，去做埋身體檢查，確定一切正常，今年重出江湖就無後顧之憂。而據田少身邊人透露，佢對自己係咪再參選都唔係十分緊張，反而對幫唐唐角逐特首就好上心，似乎緊張過自己選㖭呀。