鄭中基（Ronald）同余思敏（Sammie）嘅囡囡Emma，家約6個月大，噚日Ronald又將囡囡嘅相貼上微博恭祝大家新年快樂，相中見Emma肥嘟嘟，越睇越似老竇，連小美都留言話Emma十足Ronald咁樣，結果搞到Sammie呷醋，真係搞笑。
朱麗倩懷小龍女
而劉德華同老婆朱麗倩之前宣佈造人成功，大前日華仔同一班fans搞開年派對，席間佢率先向fans公佈，老婆腹中嘅係小龍女，搞到全場fans即時依哇鬼叫。雖然唔係一索得男，但華仔依然喜上眉梢，據知劉家一眾親朋戚友都熱切期待呢位名副其實嘅小龍女嘅來臨，當中有傳朱麗倩嘅預產期喺6月。
台灣性感女神林熙蕾亦趁住新年，貼咗囡囡嘅相出嚟，再加上特別新年效果，夠晒應節；仲有朱凱婷同曹敏莉兩個新任媽媽，佢哋兩個小B女同樣趣緻可愛，相信佢哋喺新年收到唔少大利是。