曾經與鍾欣桐（阿嬌）、鄭融傳緋聞的音樂人莊冬昕，去年為老友林峯創作的《Chok》奪得《勁歌》金曲金獎，被網民插到體無完膚，不過他的新歌《食軟雪糕》也自身難保，被網民評為年度膠歌，歌曲長達4分45秒，但狂叫「食軟雪糕」81次，簡直是挑戰樂迷忍耐力極限的神曲。
莊冬昕由幕後跳到幕前做歌手，改藝名Deal，惡搞香港樂壇，他在網上推出了第一首處女歌《Dealersing》後，近日再接再厲繼續虐待網民，由他作曲、並聯同黃厚霖一齊填詞的第二首新歌《食軟雪糕》熱爆YouTube，由造型到唱功，以至歌詞都難頂度十足兼且無聊到極，網民㷫爆網站，高登友直情火滾到在網上惡搞改歌詞「劈到佢收口返屋企搵老母」，莊冬昕卻懶理《食軟雪糕》幾乎搞到香港樂壇淪陷，新年流流擺明食軟雪糕挑戰網民。
「放縱玩吓嘢」
莊冬昕日前接受本報記者訪問，堅持要戴着黑超，舔着雲呢拿軟雪糕，得戚地說：「哈哈，年度膠歌，我好鍾意呢個名，諗住玩吓，惡搞吓樂壇。」他解釋平時做音樂為了迎合他的歌手客仔喜好，都要認真地做音樂，難得有機會自己出唱片，唱片公司NewayStar又肯放手給他盡情地玩，所以他說：「咪放縱玩吓嘢。」
莊冬昕的放縱，卻惹來網民反感狂踩，難道不怕影響音樂人聲譽及創作人形象？他說：「香港人咁大壓力，就係想畀機會大家鬧吓發洩吓。」莊冬昕表示每日都有上網睇網民對他的人身攻擊及狂踩、狂鬧，他騎騎笑說：「我覺得好正，網民嘅評論每日都好有創意，我唔覺係人身攻擊。」為何會想到寫《食軟雪糕》？他說：「香港人壓力咁大，軟雪糕就好似我啲歌咁幫人減壓，我發覺軟雪糕已經係香港人嘅象徵，街邊嘅雪糕車同麥當勞嘅軟雪糕日日排長龍，冬天凍冰冰都咁多人食。」
與鄭融冇聯絡
對於被網民勁彈唱功差，莊冬昕說：「係呀，我係唱得好差。」是否諗住靠靚仔樣？他耍手擰頭說：「我唔做偶像派，做偶像好辛苦，賺唔到錢，我只係唱吓玩吓，娛樂大家。」阿嬌和鄭融有沒有聽過其新作？他笑說：「唔知喎，冇聯絡喇，只係做嘢見過吓面。」
採訪：陳玉琼 攝影：陳順禎