公司玩神秘，通常冇好下場，合生創展（754）就係一個好好嘅樣辦。合生嘅前財務總監譚禮寧（L.L.Tam），自從07年離開後，呢5年嚟管理層都「保持神祕」，除咗春秋二祭（中期、全年業績）之外，基本上唔係幾見人，即使係業績會，都冇乜營運指標同人分享。
不過，舊年11月先上場嘅CFO張懿，近排一反常態，主動同芬佬講，未來將會集中同投資者溝通，仲會提高公司嘅透明度㖭。乜嘢事令佢哋嘅態度180度大轉變呢？無他嘅，合生喺L.L.坐鎮時，股價由05年嘅4蚊多啲，爆到上去24蚊佢先走。之後公司玩神祕，聰明錢自然識搵路走，股價去到舊年11月，即係呢位CFO上場前，跌到得3蚊多啲咋，總算佢知道透明度嘅重要性，所以咪向芬佬宣誓會提高透明度囉，咁識做，股價家升到就嚟5蚊，掂！