【本報訊】大澳龍舟遊涌已有百年歷史，去年被列為國家級非物質文化遺產。自20多年前從父親手上接過統籌遊涌工作大澳傳統龍舟協會主席樊森記，滿以為自此毋須再為遊涌籌款，可惜自去年的慶典完結後，政府似乎忘記了這個百年傳統，離島區議會更從來不關心，於是這位65歲的老人又要再次為遊涌撲錢。記者：黎穎詩
樊森記說舉辨遊涌活動只需30萬元，但因缺錢，遊涌的龍舟沒有一個似樣的「龍廠」。三艘剛退役龍舟被迫放在戶外日曬雨淋，三艘新龍舟則放在一個用膠及鐵皮搭成、不夠六呎高的貨倉；遊涌需要的其它物件，如鼓、龍頭及龍尾，就堆放在旁邊一個鐵櫃。
龍廠簡陋不足以保護
民政事務局局長曾德成去年在遊涌慶典上曾表示，政府會傳承、研究、宣傳及保護非物質文化遺產；香港文化博物館館長（非物質文化遺產）稱列入名錄，會增加巿民對大澳的認識，亦可帶動旅遊業。
「你睇我哋個龍廠，龍舟放喺度，好天曬落雨淋，舊得好快。啲龍頭龍尾又要分開放，我哋好想起一間似樣嘅龍廠，唔單止可以好好收藏、保存啲龍舟，亦可以將收埋喺櫃啲配件攞出嚟放好，巿民幾時嚟到大澳都可以睇到龍舟。佢哋可以影相，又可以了解呢個習俗」。但現時無奈要把龍舟收起，巿民平日來到大澳無緣看到龍舟。
「本來以為今年會容易啲搞，點知同以前一樣。慣咗啦，冇所謂。大有大做、細有細做。冇錢咪簡單啲。呢個係傳統，一定唔會唔搞。我哋從來都係靠自己，即使冇任何資助，會好似以前，唔會大搞。」樊森記說。他說，外界捐款都花在遊涌儀式包括裝飾整個大澳的彩旗、龍舟運動員的服飾，龍舟的翻新以及裝飾。整個活動需要提供的免費飲食，全部由村民自發提供。「遊涌係傳統，個個都覺得自己要出一分力，每戶都有夾錢，個個都好重視，特別係啲老人，一定要夾錢。」
區議會只批助八千元
過去三年，大澳傳統龍舟協會也有向離島區議會申請資助，每年只獲8,000元。去年因成為國家級非物質文化遣產，獲康文處資助70萬，但今年一直無消息是否會再贊助，他打算過年後去信康文處，希望盡早落實今年的贊助。但已決定不再要求區議會，「佢哋跟本唔覺得遊涌重要，過去幾年都只批8,000蚊，又要我哋寫建議書，我哋又老又唔識字，點寫？」
樊森記希望政府有恒常資助制度，「我哋個個都一把年紀，我已經係最後生，真係冇能力年年搵贊助。」而令他最自豪的是，大澳擁有全港唯一一個白鬚的龍頭，「其他嘅龍頭都係黑鬚，只有呢個屬於我哋扒艇行嘅係白鬚。點解？因為我哋夠老，祖先傳落嚟。」