停牌多年嘅海域集團（1220）早前復牌，股價跌到冇朋友。華華都明嘅，見到間公司搞復牌搞到蝦碌連場，叫人哋點夠膽捧場呢？
蝦碌一，海域早前嘅股東通函話，新股東周承炎注入嘅得利，係房委會「認可鋁窗供應商最後名單」同「認可不銹鋼閘組合供應商名單」，點知1月9號張復牌通告竟然話，向房委會查詢後，得到嘅回覆係，呢兩個名單已經「不再保存可供公眾查閱」。嘩！咁都得？
好戲在後頭，蝦碌二，海域上星期公佈，原來集團冇將1月9號張復牌通告初稿畀證監會審閱，華華心諗，如果證監睇到初稿，知道海域咁兒戲，都唔會畀佢復牌啩？皆因海域講明，房委會認可供應商憑證係復牌條件之一。但係如今得利嘅憑證資格成疑，但海域又照復牌，有冇人話畀華華知點解呢？