阿爸阿媽或者老師叫你睇書，你真係睬佢都儍，但換轉由公眾人物叫你咁做，唔知點解你又會照聽。英超聯賽會為咗鼓勵大人同小朋友睇多啲書，最近就搞咗個叫《英超閱讀之星計劃》（ThePremierLeague'sReadingStarsprogramme），搵咗20間球會嘅代表向公眾推介兩本心水讀物（一本畀大人，一本畀小朋友），其中阿仙奴嘅禾確特認真hardsell，竟然推介自己本書畀小朋友睇。
禾確特sell埋自傳
唔少英超球星嘅心水讀物，都係喺著名作家羅琳嘅《哈利波特》系列，其中兵工廠翼鋒禾確特同熱刺中場卡蘭積卡都係推介《神秘的魔法石》（HarryPotterAndThePhilosopher'sStone）；而曼聯後衞基斯史摩寧嘅選擇就係《火盃的考驗》（HarryPotterAndTheGobletOfFire）。話時話，《哈利波特》喺全球hit爆，就算班球星唔推介，相信英國嘅大人細路都有興趣睇。
禾仔仲鬼咁醒目，喺推介《哈利波特》之餘，順便sell埋自己本著作，大讚佢本《TJAndTheHat-trick》好啱小朋友睇。
祖爾巴頓愛睇《德古拉》
除咗羅琳，被認為幻想大師嘅RoaldDahl亦好受英超球星歡迎，好似阿士東維拉嘅蘇格蘭小將班倫就推介《朱古力掌門人》（CharlieAndTheChocolateFactory），新特蘭守將奧沙同史雲斯中場里安比頓嘅選擇，則分別係《狐狸先生無得頂》（FantasticMrFox）同埋《飛天巨桃歷險記》（JamesAndTheGiantPeach）。
另外，昆士柏流浪隊長祖爾巴頓亦好喜歡RoaldDahl，所以推介咗對方嘅《女巫》（TheWitches）畀小朋友，但我求大俠睇到個封面，覺得有啲恐怖，應該唔係個個接受到。
祖爾巴頓亦推介講吸血殭屍嘅《德古拉》（Dracula）畀大朋友，呢位英格蘭中場話本書極之好睇，所以佢亦會睇完之後再翻睇。話時話，佢喺場內場外嘅行為都咁顛喪，唔知係咪同睇多呢本書太多有關呢？