企業近排都會搞春茗、周年晚會等活動，同員工分享一年來嘅成果。內地就會舉辦年會，除咗有機會睇到百度嘅度娘同網易嘅易娘呢啲年會美女之外，重頭戲當然係年終獎，即係類似年尾花紅。
蘋果＋手機＝iPhone？
打工仔抽獎當然最希望收cash，網上流傳話有內地企業發咗27個月人工做年終獎，令我哋呢班打工仔鬼咁眼紅。財力冇咁雄厚嘅，就要考吓佢哋嘅創意，內地網友搜羅各網上消息，整合咗一系列最另類年終獎，有老闆送饅頭（寓意蒸蒸日上）、送旅遊獎賞（包唔包使費先？）、奉獻一次洗腳服務（員工係咪真係敢收？），連棺材都有，寓意升官發財喎。
強國創意無限，獎品千奇百怪，作為打工仔見到咁多騎呢嘅獎品，有時寧願做運滯個個。咪住！有公司明白打工仔嘅心理，自設遲到券、年假券、專車接送券，夠晒實用；至於同胞引頸長盼嘅蘋果產品，當然都有，有公司就送咗一個蘋果加一部手機，成另類「iPhone」，網上消息唔知真假，不過若果收到呢啲「惡搞」，都唔知好嬲定好笑。