相信唔止陳慧琳、楊千嬅、劉德華呢啲天王巨星趕住生龍年ＢＢ，每逢龍年都會出現生ＢＢ潮，可能你會話家都未懷孕驚趕唔切，我哋今次就由中國風水同西方醫學角度同你全方位分析，等你趕搭龍Ｂ尾班車！
記者：陳家蕊
攝影：林栢鈞
Model：Martin、Paris@PureModels
東北位 旺生仔
上官知正師傅計過九紫飛星，今年的東北位大利旺添丁，如果大家在家中東北位行房就最容易懷孕！提提大家，準確的東北位是要由全屋的中心點用羅盤量度，除了羅盤，用智能手機下載相關Apps亦同樣幫到手，最緊要唔好搞錯！
如果幸運地睡房在東北，順理成章呢間就係旺丁房；如果食唔正靚位，上官師傅話可在床邊擺放紅地毯，同六個英女皇硬幣，就可增加懷孕機會。另外大家亦可以在房屋的玄關位擺放紅色燈及八粒石春，再加上一棵泥種的大葉植物就最好了！
龍B風水陣 最忌水
雖則東北位大旺添丁，但就忌水，如果有魚缸就記得要移走，另外仲要保持呢個方位窗明几淨；風水陣要在正式踏入龍年後先好佈置，而今年正式踏入龍年的日子是2月4日下午6時22分。另外，有個別生肖在今年特別有生育運，分別係甲子一九八四年的老鼠，庚申一九八零年的猴子同辛酉一九八一年的雞，如果大家咁啱係呢個生肖又想生龍B，努力啲就好快會有喜訊！
上官知正師傅仲話，中國人要生龍B係因為龍在中國的傳統中代表咗王者、有權力同領導能力，但並唔係話龍年出世的人條命會特別好，好多時候仲要睇番嗰年係咩屬性的龍年，配合番出世的日子先啱。
趕生入冬旺龍B
首先恭喜晒各位準爸爸媽媽！因為上官師傅話龍B最佳的出世時間係八月至十月的秋天，命最好也最旺父母！不過未懷孕的也可以放心，因為龍年冬天出世的B同樣旺父母。何謂冬天出世龍B？咪以為夠凍就係，根據節氣，立冬之後九十天就是冬天，亦即是西曆的2012年11月7日上午8時56分至2013年的2月4日凌晨12時31分立春為止，計計條數，如果喺呢幾個月受孕都趕到冬天龍年B喎！
排卵測試一擊即中
生殖醫學專科藍寶梅醫生話想懷孕，最重要當然係令卵子受精，所以女士計啱排卵期同老公行房就最合適不過。
想自己計算排卵時間，可用基礎體溫表。量度基礎體溫可在每天醒來後測量口腔溫度，一般女性排卵後的基礎體溫會提高攝氏0.5至1度，而且會維持到月經來潮的第一天止。由月經來潮的首天起，每天醒來馬上量度及記錄體溫，觀察體溫波動，如果月經周期非常規則，基礎體溫亦在每個周期同一日上升，夫婦就可在正值體溫上升的排卵期或前一天行房，以增加受孕機會。
另一方法是到藥房買排卵測試劑。女性排卵前24至36小時，促黃體生成激素（LH）會升高，用排卵測試劑驗尿液中LH含量，並在結果呈陽性反應當日或後一日行房，就有機會一擊即中！
