【本報訊】不少市民愛到觀塘開源道一帶工業大廈買「開倉貨」，間中更會執到「名牌清倉貨」，有蠱惑商人覷準港人愛名牌心態，竟在冒牌貨貼上「吉之島」價錢牌，用名店「跳樓貨」包裝促銷冒牌貨，趁春節賺快錢。市民執平貨買靚衫過年，隨時買着冒牌貨。
一小時賣40件營業額過萬
近日早上11時許，出名專賣「開倉貨」的開源道，經常出現五名男女，拖着幾袋紅白藍膠袋和紙皮盒擺賣。其中兩名男子熟練地走到街頭和街尾「睇水」充當「天文台」，其餘三人把紙盒打開，裏面已放了多件TheNorthFace和Columbia的羽絨大褸。戴眼鏡的男子隨即叫賣︰「名牌清倉貨，原價千幾特價二百八，賣完就冇！」不少路人一聽到名牌清倉貨，即時走過來搶購。「你睇吓，吉之島啲貨嚟架！」其中一名女士看到掛在衣服的牌印有「JUSCO吉之島」後，就像執到寶般興奮。「係呀，老細識得吉之島高層，啲貨係吉之島漏出嚟架，原價要千幾蚊，賣完就冇㗎啦！」
操大陸口音的女子說罷，選購的人更瘋狂，還未試穿已爭着付錢，短短五分鐘已賣出四件。45分鐘後，六個紅白藍膠袋的貨幾乎賣光。
此時，街頭的「天文台」突然大叫：「走鬼呀！」三人迅速將紙盒合上離開，不少仍未購買的人卻不肯罷休，窮追檔主走到後巷繼續搶購。保守估計，短短一小時內，該小販檔已賣出接近40件羽絨，營業額過萬元。
為分辨真假，記者亦以280元買了一件Columbia羽絨褸，還拿到黃埔吉之島的Columbia專門店查問是否正貨。在該店做了六年的售貨員鄧小姐，看了看該羽絨皺着眉頭說︰「Columbia冇呢個款！睇嚟似冒牌貨，出面實在有太多冒牌貨，街邊檔全部都係賣呢啲。」
Columbia專門店解構正貨
她隨即點出四個不同處︰第一，該羽絨的手臂位繡了一座山的圖案和TITANIUM的字，但正貨不會繡上山的圖案。第二，防水拉鏈袋無法拉開，原來是個假袋，但正貨必定是真袋。第三，Columbia在港售賣的貨品，最大只是雙加大，根本沒有四加大。第四，羽絨的貨牌印刷十分簡陋粗糙，正貨則有一大叠有關功能和使用需知的說明。
其後，記者再將該羽絨釘上印有吉之島logo的標籤牌，拿到吉之島服務台，要求職員驗證是否該公司貨品。櫃台職員Sarah替我們用掃描器掃一掃貨牌的條碼，但沒有反應。
「冇呢個barcode（條碼）喎！我哋公司全部貨嘅barcode都係劃一用00開頭，唔會有GTS呢啲英文字。而且我哋自從04年上市後，貨牌冇吉之島呢幾個字，只係得英文JUSCO，所以肯定呢個唔係我哋JUSCO嘅貨！」