新世界系已經由董事總經理鄭家純全盤掌舵，唔少人都知，而主席彤叔嘅長孫鄭志剛（Adrian），唔經唔覺都掌管咗新中（917）、新百貨（825），順便幫手管埋新世界發展（017）一段日子，一向計仔多多嘅Adrian近期向芬佬誓言話要重奪四大發展商之位。
兩新項目今年推出
過去幾年，新世界因為冇乜賣樓時間表同延遲開盤，令唔少買樓客仔流去買新地（016）同長實（001），搞到新一輩唔知新世界曾經係堂堂四大發展商之一，只係知BIG4包括信置（083）同恒地（012）。事實上唔單止掌舵人要交棒，公司由超高級管理層到高級管理層、產品管理部到賣樓部都要換班，到處都係新面孔，有唔少人更加係來自其他大發展商好似信置同新地咁，務必要一洗頹氣！
自從新一批管理層上場之後，證券界普遍都幾受落，好似美銀美林咁，之前就同佢發咗個報告，話今次「人事大風吹」後，新世界有潛力重返四大發展商嘅寶座，加上拖咗好耐嘅新項目終於喺今年推出，包括大坑春暉8號同埋車公廟站上蓋項目，美銀美林仲話呢兩個項目將會係評估新管理層才能嘅指標添，大家真係要拭目以待喇。
李華華
mailto:[email protected]