黃百鳴嘅天馬公司同邵氏近年都會拍賀歲片對陣，頭兩年都係邵氏嘅賀歲片險勝，今年就出現變數，佢哋嘅對手包括英皇投資、林超賢執導、周杰倫同謝霆鋒演嘅《逆戰》、張藝謀執導、基斯頓比爾演嘅《金陵十三釵》，同埋爾冬陞執導、梁朝偉同周迅演嘅《大魔術師》，但華語片似乎攞唔到太多甜頭。
今年嘅賀歲檔，暫時由奇幻秘島探險3D荷李活片《地心探險記2：世外秘島》獨領風騷，呢套片由狄維莊遜擔綱，上映6日，截至前日票房累積約1,605萬，前日單日票房高達340萬。曾志偉幫邵氏監製嘅《2012我愛HK喜上加囍》，雖然冇大卡士，但承接上集口碑，加上電視密集式宣傳，上映5日約收659萬，前日單日收約191萬，睇走勢，套戲應該有機會做賀歲檔華語片票房冠軍。
《八星抱喜》落後
由黃百鳴監製、陳慶嘉執導、甄子丹同古天樂主演嘅《八星抱喜》，空有一班大卡士，上映5日票房只約有412萬，前日單日約收102萬。至於《逆戰》上映4日連特別場收入，截至前日票房就收672萬，前日單日約收130萬，上映頭兩日票房都贏《我愛HK》，但年初一起就被《我愛HK》反超前幾十萬之多。
《金陵十三釵》上映6日票房約收379萬，《大魔術師》上映13日約收573萬，而日本動畫大師宮崎駿囝囝宮崎吾朗執導嘅《紅花坂上的海》上映6日票房只有307萬，另一部美國3D動畫片《無敵貓劍俠》上映4日，票房約有579萬，成績唔錯。
