龍年首個交易日，金銀貿易場同港交所（388）都有簡單而隆重嘅開市儀式，華華嘅焦點當然係派利是「儀式」啦！話說金銀貿易場由上年百周年慶典開始，利是已經由50蚊升到一張紅底，搞到一向派開廿蚊嘅港交所急起直追，今年以通脹為名加碼到50蚊，仲準備咗20封1000蚊幸運利是。
暗示來年應加碼
港交所主席夏佳理同CEO李小加今年派咗300封利是，當中有20封係1000蚊，只係交易員先有份，公關話有一個好好彩抽中兩封金牛，真係開工大吉！
4月底就會完成6年主席任期嘅夏佳理話，今年利是加咗30蚊，連買杯咖啡都唔夠（華華去大家樂飲都夠嘅），去酒樓叫多碟點心都唔得。言下之意，係咪暗示繼任人下年應該再加碼，同金銀貿易場睇齊呢？
金銀貿易場雖然冇幸運利是，但有財經事務及庫務局局長陳家強同金銀貿易場理事長張德熙攞住金元寶扮財神爺，向在場出市代表大派朱古力金幣，寓意金銀滿屋。