特首選戰，由動物農莊變成神鬼交戰。到咗噚日赤口，兩位參選人「龍豬唐」（唐英年）同「鐵頭何」（何俊仁），仲隔空「講手」，KickBoxing大戰詠春。龍豬唐噚日唔去拜年，轉移陣地上門搵踢拳（KickBoxing）師傅互揪，但只邀請個別電視台採訪呢次課外活動。好彩八方同事自己摸上門，至冇錯過呢幕龍年巨獻。
何踩唐係花拳繡腿
咪睇唐唐鏡頭前好似好生硬，去到門口，已聽到唐唐打拳打到嘭嘭聲，似乎真係有啲料到。打拳之前，唐唐先做熱身，之後嘅揮拳、起腳動作都算合格，但係功夫再好，都打唔低地產霸權囉。打完一輪，唐太即上前為佢抹汗，幾咁溫馨。
曾經俾惡漢打到變豬頭嘅鐵頭何，噚日亦唔執輸，下午請傳媒行家到佢屋企拜年期間，喺電視機前睇見唐唐耍拳，就狂踩龍豬花拳繡腿，再即時露兩手詠春拳，對住部電視同唐唐格鬥，好彩冇打爆部電視機。唐唐識做熱身，鐵頭何亦跳上部收腹機表演修腹肌，但唔知點解佢個肚腩仲係咁勁。
八方事後問番唐唐，佢原來唔聲唔聲已練拳四年。未參選特首時，每個周六朝早都會同家人一齊去練拳，話踢拳係好好嘅親子活動。至於點解會揀學踢拳，唐唐話因為體力消耗量相當大，對心肺運作好有幫助。八方心諗，心肺好，金句就自然思如泉湧。
咁如果同狼振英隻抽，邊個會贏？唐唐話唔知狼生有冇練過踢拳，「不過既然我有練開，我諗我會贏囉」，旁邊唐太聽到拍晒手，讚老公果然拳拳到肉。
師傅爆唐唐愛刺激
問到一旦遇到狠辣對手，佢會點還拖，唐唐吐出招牌金句：「你熟習咗對方打法之後，有時佢會消耗佢自己的精神」，呢兩句有乜關係，坦白講，八方唔係好get到。唐唐師傅就話，唐唐打拳一向都打得唔錯，又透露唐唐平時「好鍾意試吓啲刺激嘅動作」㗎。
mailto:[email protected]
