一年兩次嘅財經界科舉CFA（特許財務分析師）又放榜喇！唔知係咪因為經濟動盪不安，搞到好多人都要有嘢揸手先安心啲，令去年度CFA全球報考人數創48年歷史新高，有16.44萬人。CFA官方解釋，係因為市場大上大落動搖咗投資者信心，要用學歷嚟重建信心喎。
咁及格率又點呢？華華睇落就覺冇乜特別，若果只睇12月嗰次考試嘅及格率（LEVEL1），大約係38%，雖則低過咁多年嘅平均及格率（約47%），但都未係歷史低位（05及09年及格率只有34%）。有外資行分析員朋友同華華講，及格率比過去三年都高，可能係同舊年下半年個市好淡，大家多咗時間溫書有關。佢仲話，投資銀行裁咗咁多人，寫包單今年及格率可以過40%㖭！今年嘅準考生聽到，都唔知應該開心定唔開心喇……