即將榮升龍爸爸的劉德華，新年當然會抽時間陪伴家人，因為他過年後便要返內地拍戲。早前宣佈「吾家有喜」的華仔，今年更聽媽媽指令，沒有於家中貼上任何賀年飾物及揮春，怕影響BB，看來劉家上下都對BB都十分緊張。
劉德華年初十便要到北京工作，即將榮升爸爸的他於新年當然要把握機會陪伴家人。原來華仔多年前會親自下廚炮製賀年餸菜，他的撚手小菜是白切雞，華仔說：「我已經成10年冇煮飯啦，我最叻就係整白切雞。」
聽晒阿媽話
一向重視傳統的華仔，每逢年初一都會斟茶給父母拜年，他說：「我哋會喺杯茶度加粒糖蓮子，但係就唔使跪喺度斟。」華仔以往都會親自寫揮春，不過今年劉家有喜，劉媽媽已下令不准張貼揮春，怕影響BB，華仔解釋說：「今年唔寫啦，阿媽話唔可以貼嘢，呢啲嘢一定要聽老人家話。」
華仔又說，每年年初一都會與家人吃齋，又笑說自小就對齋菜中的蠔豉存有疑問，他說：「我成日覺得蠔豉唔屬於齋。」
派十萬利是
另外，華仔早已預備好十萬元封利是，記者笑指他就快可以回本，因為很多人會派利是給BB，華仔大笑回答：「未收呀，未收呀。」
採訪：李珮洳
攝影：陳俊強