初五，除咗係好多公司開工嘅日子之外，相傳仲係財神生日！為隆重其事，今日我哋嚟一個財神巡禮，睇吓你同邊個財神像最有緣，唔使買蛋糕，請佢入屋當慶祝！假如將佢放正喺財位，仲有望龍年財源滾滾㖭！
記者：溫曉嵐
攝影：潘志恆、蔡家輝
Model：Paris
貼財神 忌對廚廁位
初五又稱「破五」，新年頭幾日諸多禁忌，來到今日終於可以破禁！例如大年初一至初四唔掉得垃圾，今日終可一掃而空，有送舊迎新意味！而今日更加係財神爺生日，送窮神迎財神就趁今日！根據民間傳統習俗，家家戶戶會做一個稱為「五窮娘」嘅紙版公仔，連同垃圾一齊丟掉，有「送窮媳婦出門」嘅意思，食飯則要食得特別飽，俗稱「填窮坑」咁話！送完窮神，就要接財神啦！除了燒衣還神，最好當然係貼張財神或買個神像放屋企坐鎮啦！不過神像唔可以隨便擺，要擺就要擺吉位！身為香港及中國adidas風水顧問嘅梁伯銓師傅話，財神像宜置於西方財位，次選東北喜慶位，如能面向大門或陽台，形成坐東向西或坐西南向東北局勢則更佳，不過切忌面向廁所門及廚房門。另一邊廂的李丞責師傅又提醒，不宜置財神於五黃太歲位及北方病位！
最緊要合眼緣
識得揀，除咗可以做老闆，仲有機會同財神做好朋友！其實揀財神像好簡單，同揀情人一樣，首要條件係合眼緣！梁師傅話，財神面貌最重要係祥和及面露笑容，如果見到某神像時感到特別喜悅，即表示你同該神像有緣！雖然緣份呢家嘢話唔埋，但其實財神都有好幾個，最簡單區別係文財神同武財神，聚寶城的賴志明先生指，如果從事文職或打工仔可以選擇手持如意的文財神，經商做老闆或較多體力勞動者，則可選手持兵器的武財神；也有一說是文財神掌「正財」，武財神掌「偏財」。不論文或武還是一對對買，買返屋企的財神像要帶到財神廟開光，方能請財神入屋，不然財神像只屬一般擺設。
財神到
文財神有好幾個，其中一個相傳是忠臣比干，因為佢無心，所以不會偏私。而武財神最有名的為關公及趙公明，前者紅面長鬚，後者通常黑面濃鬚，粗眉大眼，有時更會手執寶鞭騎老虎。
男右女左招財貓
除咗神枱上的財神，招財貓在招財界也相當有份量！正統的日本招財貓有分公乸，公貓舉右手代表招財進寶，母貓舉左手代表招福旺人潮，後來漸漸出現雙手齊舉無分性別的「陰陽貓」，代表財福雙收咁話！
a）聚寶城（27810699）
b）李日記（27807639）
c）金至尊（27663293）
d）HAMs.JBCo（25041848）
e）貓貓地（25108442）