林保怡過去一年名利大豐收，今個農曆新年選擇留港與家人歡度新歲，向親友們大派利是。不過保怡親友卻要求他送《天與地》片尾曲《年少無知》CD多過想𢭃利是，令保怡極度頭痕，惟有寄望無綫早日推出雜錦碟，令《年少無知》有機會出生天。
林保怡過往農曆新年，不是在工作中度過便是與家人到外地過年，如去年他便與家人到北海道旅行，今個農曆新年，保怡卻選擇留港歡度新歲，順道好好休息。
旅行仲辛苦
日前保怡在電話中說：「舊年去北海道，又搬行李又搭火車，上上落落都幾辛苦，今年可以舒舒服服喺香港過。其實今年留喺香港過年都會好忙，因為好多親友約咗嚟屋企拜年。」豈不是多了很多機會𢭃利是？保怡笑說：「咁大個人仲𢭃利是唔好意思。」
保怡續說：「今年我會派利是，不過好多親友都問我要《年少無知》CD，一早打定電話嚟，話好鍾意首歌，要我送CD畀佢哋，但呢首歌都冇出碟，點送啫。我家都諗緊辦法，希望首歌會有好下場，可以出到TVB雜錦碟啦。」
碌柚葉冲凉
今個農曆年，保怡也有行花市買水仙等年花佈置家居，年廿八用碌柚葉冲凉冲走衰運。記者指保怡過去一年大豐收，以碌柚葉冲凉豈非連好運也冲走？保怡笑說：「有人同我講過，既然冇衰運就唔使冲啦，但我年年習慣咗，點都會冲一冲。」
採訪：戴彩煥