「纜車仲凍過雪櫃，雪足兩個幾鐘，忍尿谷到痛，點頂呀大佬？」數百市民初三赤口到大嶼山行大運，乘搭昂坪360卻遇上纜車故障，開心之旅變成「急凍之旅」，苦不堪言。
職員：等吓啦冇辦法
港人黃小姐與表哥等親友九人，昨晨10時許到昂坪天壇大佛遊玩，下午2時許乘纜車落山。眾人欣賞山間霧景，纜車運行10多分鐘突然停在半空，車廂廣播指車務調動短暫停駛，各人以為真的是「短暫」，不料一停便是兩個多小時。
各人雖穿厚衣保暖，但被困冰冷如雪櫃車廂兩個多小時，漸漸凍得手腳冰冷，個個人有三急極想小便，膀胱「谷到痛」。黃小姐說︰「車廂好潮濕，水氣喺玻璃窗外結成水點，感覺更加凍；山頭大霧，視野模糊，乜都睇唔到，真係叫天不應叫地不聞。」
黃說，家人多次致電昂坪360查詢熱線，職員回應說︰「等吓啦，咁凍，機件運作慢啲，冇辦法……」家人忍無可忍回敬︰「大佬呀！咁凍，明知故障就唔好開啦！」眾人被困半空「走投無路」，再無心情欣賞霧景，個多小時後等到纜車重新啟動，以為終可脫困，但纜車時開時停，慢如螞蟻。
她說，職員曾經承諾纜車駛至機場島轉向搭時，會讓乘客落車，但到場後各人拍打車窗良久，卻被控制室內職員當作透明。纜車慢速駛到東涌站，各人即落車衝往洗手間，才舒一口氣。《蘋果》記者