上個禮拜八方去親銀行都排隊排到儍，因為好多人都趕住新正頭之前換新鈔包利是。本報讀者戚先生都湊熱鬧，去太古城滙豐分行換幾張一千蚊紙嚟留念，點知發生疑似錯體疑雲。
戚生儲咗幾年新鈔，大讚呢款滙豐新鈔嘅印刷質素係近年之冠，不過佢手上其中一張似乎有些少「瑕疵」。銀紙中間偏上嘅office字樣，啱啱同背景線條叠住，office個「c」字印到好似「e」字咁，其實每張銀紙嘅背景線分佈都有些少唔同，唯獨呢張有混淆。「我都唔知係咪錯體，去銀行換唔會係假銀紙啩。」八方攞住張圖問滙豐公關，對方話呢張銀紙唔係錯體，條線叠住個字母，係正常印刷現象，叫戚先生放心。如果各位客戶有疑慮，歡迎去滙豐分行查詢。