年初四，好多打工仔都開始返工，香港電台嘅《議事論事》今晚都請咗余若薇、涂謹申、陳婉嫻同觀眾拜年，7點亞視本港台有得睇。余若薇係民主女神，但佢細個嗰陣根本冇諗過從政，淨係鍾意睇愛情小說，成日發白日夢幻想有白馬王子出現。雖然佢老公唔識騎馬，又唔係王子，但余大狀就好感激佢對家庭嘅無私付出。
剛為人父嘅阿涂就表露出柔情一面，阿涂話佢家陣48歲，最希望係保持身體健康，睇到阿仔中學畢業就心滿意足。主持人飛哥問嫻姐有冇因為從政而放棄愛情，點知嫻姐就爆料話：「唔可以話放棄，只係志不同道不合，相處咗一段時間就分手。」