今日初三赤口，年輕一輩就算好潮好In，但講到傳統習俗，都唔敢出門拜年，為免被老人家鬧，還是結伴「過大海」吧！現誠意推介一個遊澳門的行程企劃，親力親為高攀61層，再在無遮無擋的高處行大運，目標是玩足一日，放埋煙花先返歸。
行大運時間表
9:00am 離港往澳門
10:30am 往澳門塔步行登頂
11:30am 玩SkywalkX
12:30pm 往喜迎樓午餐
3:00pm 欣賞龍騰Show及到氹仔市區/澳門市區
5:30pm 往壹號廣場外拍照
6:00pm 看MGM巨龍雷射表演
6:30pm 步行到澳門塔外放煙花
7:00pm 晚餐或回港
升級坐豪位
年初三不妨加多少少錢Upgrade埋你的船票，來一次豪遊澳門。噴射飛航全新打造的至尊噴射船備有北歐名師設計座椅，無論乘坐貴賓廂或尊豪位，可享用精選熱餐配飲品，有特別的候船室，而且有免費Wi-Fi，服務超正。
乘坐噴射飛航可於上環信德碼頭出發，直達澳門外港碼頭，船程約1小時。假日普通位由$163起，至尊噴射船尊豪位由$386起，4座位的貴賓廂由$1,919起。
查詢︰28593333
第一運 慢行61層樓梯
行樓梯？好濕碎呢！兩小無猜的Lincoln與Kitty來到澳門行大運，點會去行條普通樓梯咁行貨呀，當然要行澳門塔啦！我並不是講笑，61層高的澳門塔，每逢年初三都開放予公眾，命名為「步步高陞登塔日」，Lincoln與Kitty今年決定來參與，起步點在廣場外的塔底，直接走入澳門塔就開始沿樓梯逐層上。活動分兩節，早上十點半開始由地面出發，第二節則在下午二時起於34樓起步。如果真係怕自己行唔掂，不妨考慮下半場啦，好似跑半馬咁，減半程。而若果真係太辛苦，其實每逢雙數樓層皆有出路，轉乘電梯登頂也可。
這個活動至少搞了3年，為鼓勵同打氣，大會也加插獎品給予最快最先登上61樓的朋友，分男、女子及小朋友組別。聽講最快的男子組冠軍大概分幾鐘已經到達，佢一定係飛上去的，有無咁好體力呀？正常人一般20分鐘至1小時可到頂，仍可獲紀念品作鼓勵。
步步高陞登塔日
地址︰澳門旅遊塔
時間︰今日早上10:30至下午6:00
查詢︰（+853）28933339
第二運 心想事成轉個運
登頂成功後，咪走住，現在要做一項初三最受澳門人歡迎的活動︰高空行大運！不過今次行得比較寸，是在塔的玻璃窗之外行SkywalkX，寒風於61層高的雲端吹來，加上如此居高臨下，真係腳仔軟。不過我睇Lincoln與Kitty點都要故作輕鬆，因為好多人在觀光塔裏望到實，惟有笑住揮手啦！帶住我們的阿傑傳授各種不同招式，例如45度站在塔邊傾斜向外，扮BungyJump姿勢、高空盪鞦韆、凌空高跳，Kitty初時話好驚，點知玩到唔願走，兩位繼續似甩繩馬騮！
空中漫步X版
地址︰澳門旅遊塔61層AJHackett
費用︰年初三澳門居民可以$138
參與；其他旅客可享八折約$550。
第三運 年年有餘米之蓮
中午醫肚時間到，今日來澳門要應節，一於食中菜，仲要係米之蓮廚師的中菜！慕名而來搵譚師傅，佢曾經是帝影樓總廚，於2009及2010年兩度被選為澳門米之蓮一星餐廳，之後佢過檔喜迎樓，所以今次我哋就跟實呢位星級廚。正值農曆新年，喜迎樓推出精選套餐，比較適合大家庭享用，一席10位，午市晚市有供應。午餐時段只得兩個人，一般可叫點心食，總之就要食得開心，年年有錢使，年年有今日。
喜迎樓
地址︰新濠天地新濠大道1/F（龍騰天幕對面）
電話︰（+853）88686636
網址︰ http://www.cityofdreamsmacau.com/
第四運 龍飛鳳舞免費Show
玩咗半日又食飽，一場來到新濠天地不如睇埋免費Show，如果消費滿$200，已經可獲得龍騰Show入場券。專為龍年推出的新版本，十二生肖中的金龍會出現，10分鐘的表演不會悶場。之後不妨繼續去澳門市區行大運，美高梅酒店新年期間在中庭吊起一條巨龍，足足8噸重，由《變形金剛》漫畫家PatLee操刀，每晚6點開始配合雷射燈光與煙霧，亦是另一項免費又富娛樂性的活動。又或者在美高梅旁邊的壹號廣場地板上有張3D立體畫，都屬新鮮的旅遊拍攝點，成個下晝咁長，去邊度玩真是有大把選擇。
第五運 百花齊放煙花會
想自己親手放個世紀末煙花，惟有去澳門。每逢大年初，澳門政府都劃分出煙花燃放區域，等你自己可以過手癮放煙花，聽講好多情侶同一家大細，最enjoy呢項夜間活動，燃放區開到凌晨，可見其受歡迎程度。朋友親身試過，話好多人戴住頭盔放煙花，怕爆到自己個頭咁話，我覺得是搞笑居多，實情是騎電單車專程來玩的澳門居民好多，尤其後生仔，為保護自己都係戴埋個頭盔。今年煙花燃放區由年廿九開始至年初五，今日年初三，記得放埋煙花先離開澳門啦!
新年煙花燃放區
1.澳門孫逸仙大馬路（澳門旅遊塔外）
2.氹仔史伯泰海軍將軍馬路海傍（舊氹仔橋空地）
日期︰年初三至四早上10時至凌晨12時、年初五早上10時至凌晨2時