狼振英舊年辭任城大校董會主席，全身投入選戰，由老友柯清輝頂上。須知道柯大俠貴人事忙，分分鐘一百幾十萬上落，八方聽聞柯大俠已放聲氣，想教育局局長孫公盡快搵番個正印主席，俾佢功成身退。
然而孫公都好頭痛，皆因城大校董會主席位絕對唔易坐，難在邊處呢？話說CY辭職前，傾全力支持城大搞獸醫學院，但政府指使費貴、畢業生出路成疑，表明唔會科水，家陣唔知如何收科。所以邊個做新主席，勢必要硬食呢個燙手山芋。
據小道消息，教育局已最少向五個人招手，但人人耍手擰頭。梗係啦，接受政府委任，即係要將獸醫學院個project煞停，試問邊個敢貿然上位呢！