恭喜發財！祝各位戰友龍馬精神、身體健康、財源滾滾來。蠱惑兔全年埋單跌16%，好彩嘅係攞番個尾彩，最後幾個交易日發力抽上，收爐仲企穩兩萬點，為今日嘅紅盤打好根基。擁有多個知名品牌嘅迪生（113），近排升幅唔算多，有望成為零售股第二梯隊，接力炒上，中線博見5字頭。
截至去年9月底，迪生中期賺6252萬銀，按年增長2.4%，毛利率逼近55%，非常吸引，公司仲揸住7.6億銀Cash，佔市值一半，財政狀況頂呱呱，年度化息率超過6厘，攻守兼備；上季HarveyNichols喺太古廣場開設亞洲旗艦店，瞄準強國人民，盈利能力肯定有增無減。
迪生上周五收報4.26元，升2.7%，成交逐漸增加，10日線快將升穿50日線，形成第二個黃金交叉利好訊號，後市可看高一線。戰友可候4.20元水平買入，短炒睇升一成，中線博見5元，屆時PB都只係0.8倍。
唐牛