初三赤口，冇乜人理啦。
有年照拜，飯局照開，睡個天長地久。
難得清靜，睇電影影碟睇個天昏地暗。尤其打破過去多年，初三晚在我們家大祠堂搞OpenHouse盆菜宴，老老實實大家開心，自己忙個人仰馬翻！今年搞還是搞，轉個日子，規模精緻，菜式也撚手，茅舍親友將更窩心。連增味豉油都選用「九龍醬園」新創「雙黃鮮生抽」以示求精。
連阿媽都指定，過年期間，飯間助味一定要用我們自小沿用的美珍醬園（即九龍醬園）產品；老味道配當年情，愈熟的味道愈扣人。
母親身體不適，本來打消一應傳統吃食的準備，猶幸家中有姑母，大姐並遠道歸來弟婦都是阿媽調教入廚好手，當然她老人家我們不讓落手，可心力精神仍然雄霸廚房；入口，那口味質感依然屬阿媽加零一。
而阿媽一應糕點，最為人讚嘆傳鄉里首推茶菓及雞春菓仔。
過年不吃茶菓，留待清明；吃來吃去還是阿媽水平高，一般行山郊遊路邊買來品物，皮肉一舊，差遠啦！
一應油角煎堆，阿媽最寸當然是其創意雞蛋煎堆，每年只此一次，本來HomeMade煎堆已然脹卜卜大至小皮球嘥士。在小皮球內注入葱蛋漿，落油鑊，隨波波成形，猶似巧妙設計的包裝，更是內部，未吃前看不到的布局，趁熱吃，咬下去；Heaven！熱，湯，脆，香，甜；煎堆皮薄甜脆，內蛋結構鹹香間，口口過足癮，朋友親戚無不傳頌。直接的，你媽幾時開油鑊整煎堆啫？害羞間接的，聽講你們家的雞蛋煎堆獨創只饗至親，唔知乜味呢？
超好味啦！梗係。
準備極濃生普洱侍候，一吃起碼五個，一年才不過一次，隨母親漸老身軀，更形珍稀。