議員C在過年前送阿媽入威爾斯醫院，始發覺威院已經有新翼，設備新，地方寬敞，比舊翼好好多，佢對醫學院教授C講：「威院舊翼確係好舊，好彩有新翼落成，中文大學有呢間教學醫院，值得恭喜。」
威爾斯親王醫院可以有新翼，為何瑪麗醫院廣華醫院未能重建？木宰羊。港大教授盧寵茂慨嘆已有七十年歷史嘅瑪麗醫院，大樓已追不上時代，手術室似第三世界設施，講得幾嚇人。七十年，係一段長時間，再過十年八年都唔重建的話，可能突然間有一啲人向古物古蹟諮詢委員會申請，將瑪麗醫院列為一級古蹟，永遠保留，不准重建，理由有好多啫，根據某些港大教授對古蹟嘅鑑定方法，我地可以講：（一）瑪麗建築風格糅合中西特色，可以搵到「中國文藝復興」時期建築風格，靚過破爛嘅中環街市好多，原建築物一定要保留；（二）瑪麗係無數香港市民有集體回憶嘅地方，不少人到瑪麗出生，在瑪麗睇病，在瑪麗死亡，對瑪麗之集體回憶，多過皇后碼頭、政府合署西翼幾萬倍，（三）瑪麗嘅歷史價值無與倫比，幾十年來有香港總督、高官在醫院睇病，施手術，富貴人家更不計其數，末任總督彭定康住過嗰間病房應封存作歷史文物。講起嚟，引述到過瑪麗醫院嘅達官貴人，外國名人難以一一盡錄，文物保育價值更高，香港大學黃紹倫教授一定會同意此點；（四）新一代後生，二十一世紀青少年從未見過幾十年前嘅設備、設施，瑪麗醫院保留原汁原味，係一間活生生的博物館。
左丁山才疏學淺，暫時諗到嘅理由只得咁多，有機會見到陶傑嘅話，傾傾吓佢一定可以諗到更多更好嘅理由嚟擁護好打得嘅林鄭月娥局長，將瑪麗醫院列為香港一級歷史古蹟，未經政府批准，無人可以在內更改病房間隔，仲有呀，強收何東花園等於強逼業主上法庭申請，政府用納稅人金錢去賠償，打官司有排搞（不過，啲高官用公帑打官司，印印腳，私人業主就杰啲）。但瑪麗醫院本來就是公眾嘅，列為古蹟，斗零都唔駛賠噃！劉健儀在特首答問大會，問曾特首為何不重建瑪麗，曾特首推在曾司長身上。唔，曾司長對瑪麗有難忘回憶呀！