新年伊始，魏力祝各位龍年身壯力健，財運亨通，笑口常開，經濟蓬勃，股市飛龍在天！港股兔年收盤重上二萬關，資金沽公用股及REITs，流向資源、中資金融股等板塊，成交亦上番600億銀左右，氣氛逐步好轉。不過，輪商開始出番啲貼價牛證，收回價萬九點樓上，短線隨時出現震倉，未入市嘅戰友可睇多兩日再出擊。
龍年股市點睇？歐美債務問題肯定有排未解決，阿爺經濟即使放緩，但相對全球而言仍首屈一指，在適度放水下，今年保八應無問題，內需、汽車、家電等板塊問題不大。舊年造船業捱沽，但負面因素反映得八八九九，如今年經濟略見曙光，造船定單可望大增，可鎖定為今年重點投資板塊之一。
廣州廣船（317）估值平、增長穩健，加埋經濟好轉嘅憧憬，大有條件爆升！舊年經濟講到咁差，但廣船首三季仍賺4.09億人仔，按年跌45%。股價舊年大跌56%，相信已經跌過龍，現價預測PE只有4.8倍，ROE高達15.4%，抵買到極！現時手頭有43艘新船定單，載重181.21萬噸，盈利有保證。
廣船上周五收6.68元，大升10.6%，MACD重現雙牛，可於6.60元附近入貨，先睇7.20元，升穿可再加碼，跌穿6元止蝕。
魏力