上個禮拜兩大地產代理之一嘅美聯（1200）公佈開單利是金額，無論賣盤和租盤都奀咗。中原就講明唔會裁員之餘，開工利是仲逆市升呢，無論係賣盤定租盤都有千元大利是，多去年成倍！
中原地產亞太區住宅部總裁陳永傑表示，只要代理喺年廿九至年初三，促成住宅、工商舖買賣或租賃，或車位買賣都可以攞到1000蚊大利是一封，舊年每封係500蚊。美聯早前表示，若果代理喺春節期間開到單，就可獲發680蚊開單利是，租盤就有380蚊，分別比去年少24%至32%。
雖然呢幾日天氣凍冰冰，但都有唔少經紀冒住寒風嘗試開頭單，聽聞中原港島東區就有個入行一年多啲嘅經紀，喺大年初二發市，簽咗張買賣單，真係先拔頭籌，攞頭單兼攞頭彩。