上個禮拜五李寧（2331）出咗份賣股通告，不停賣樓賣股套現嘅李寧王子，連公司嘅一眾管理層都唔放過，向包括行政總裁張志勇在內嘅四位高層，出售400萬股舊股，大約就值2600萬銀到啦。
若果四個人均分，每人雖則只係要攞六球半（一球等如100萬）出嚟，但其實都唔少㗎。以張志勇為例，佢2010年總年薪約1740萬銀，但扣晒花紅、認購權等，人工都係大約得451萬銀咋，即係張生用咗多過一年嘅人工嚟表態支持！做李寧背後男人真係唔簡單。
人工只係180萬嘅首席財務官鍾奕祺就慘啲，只係喺李寧做咗兩年嘅佢，用咗未來三年幾嘅人工嚟表態支持。點都好啦，公佈咗之後李寧股價升咗8.5%，大家開心！