龍年伊始，沙膽虹首先祝各位龍馬精神，萬事如意。沙膽虹寫咗手記幾個月，得罪人多稱呼人少，龍年首篇手記，都應該先同自己開年，鬧吓自己，檢討吓《蘋果》同《爽報》做得唔好嘅地方。
首先是舊年八月十六日《蘋果》頭版報道中大新生李天蔚自殺嘅不幸事件。記者採訪呢單新聞時，得知天蔚事發前參加過中大物理系迎新營，而她家人亦向警方提及她在迎新營後情緒低落，警方於是懷疑事件與她在迎新營經歷有關，並聯絡過籌辦迎新營的學生了解事件，惟最終發現無可疑；但我哋標題則大大隻字中大迎新營玩死女生，的確過晒火位。沙膽虹作為老總，責無旁貸，現謹向天蔚家人和中大物理系致歉。
跟住就係《爽報》創刊初期才子陶傑〈眼兒媚〉專欄。好多人以為，《爽報》出呢個有味專欄，係為咗宣傳，等多啲人鬧；越多人鬧，就越多人識《爽報》。其實點會呀？《爽報》係免費報紙，又有《蘋果》做後盾，點會愁銷路驚派唔晒要灑鹽花？最主要係諗住《爽報》派近百萬份，乜嘢類型讀者都有，所以內容都希望包羅萬有，於是先搵才子寫色情文學。專欄一出就不斷俾人鬧，沙膽虹仲自以為是，覺得難道個社會咁大，都容不下一個咁嘅專欄和幾張性感模相？沙膽虹未做過免費報紙，唔意識到周街免費派畀人同要畀六蚊去買嘅分別。後來經明光社和各界點醒，先至識死，以後對內容選材都小心翼翼，寧願保守啲。
沙膽虹