迎合農曆新年潮流，除咗為自己添上新裝，又點可以唔幫一直跟身部iPhone，來個齊齊大變身！講緊係帶有新年色彩嘅MobileCase，對一眾女士，最鍾情莫過於金光閃閃，貼滿水晶嘅iPhone4S殼；而愛型嘅男士們，似乎更喜歡傳統，甚至刻有浮「凸」紋身嘅「龍」字頭機殼，想揀邊款？Show畀你睇。
記者：陳國輝
攝影：譚盈傑
Model：Irina@Zmodel
鳴謝：朗豪坊
HandMade水晶搶眼
用水晶砌出特別圖案嘅iPhone機殼，款式非常多，但講到應節兼具新年氣氛，要數呢款以「福到」為主題嘅水晶殼，採用大紅和金黃色為主調，勁有中國傳統味道之餘，仲金光閃閃，拎上街肯定好搶眼；另一款玩同樣色調嘅「生意興隆」水晶機殼，對於做生意嘅朋友最有意頭，毛筆字款也夠特別，但HandMade手工一般，為求好意頭，又有乜所謂先！
玩上水晶閃石，仲有一款設計簡約嘅iPhone4SCase，底蓋部份採用仿真皮物料，手感舒適，加上全Pink色系，感覺就更加Lady；水晶材料方面，閃石圍繞住手機邊框，雖然數量唔算好多，之不過睇落又幾豪喎！
磨砂龍紋最啱男士
回歸傳統，除咗勁閃大紅色水晶，當然唔少得防跣物料。好似呢款用紅、黃色為主調嘅4SCase，咪睇佢老老土土，其實底、面殼都有，係雙面設計！防撞防跌功夫做足之餘，還有勁Cutie福貓圖案，走中性設計，男女仔都啱；但講到女仔更鍾意，可能係隨機附送嘅福袋，上面繡咗小貓圖案，係咪好得意呢！
傳統款式之中，男士應該更愛有中國龍設計嘅機殼。例如玩磨砂質感呢款，機背刻有立體龍字設計，極有氣勢；至於另一款龍紋圖案機殼，帶點男人味，不妨揀佢！
大紅色日韓風味
日韓兩地都沒有農曆新年節日，但講到意頭，一樣可以揀大紅色靚仔機殼。例如呢款擬似舊式電話撥號嘅機殼，睇真啲，其實轉盤上五顏六色嘅圓孔，係鏡頭Filter至啱，只要順時針方向轉動，即可拍攝出偏色、變形等不同效果嘅照片，玩味無窮；同場另一款玩相機造型，以及貼上貓貓毛公仔嘅4S殼，前者採用硬膠作為機殼物料，後者則採用軟膠物料，一種能夠防撞，一種設計硬淨，要點樣揀因人而異喇！
a.囍（27243888）
b.ThinkMore（68428221）
c.三禾電氣（23740618）