龍年開工大吉！先祝各位讀者龍精虎猛、笑口常開！
很久未有許過新年願望，今年決定開齋，就是立志做「名人」！所有認識我的朋友都知道我的脾性，我實在是個十分低調又深閨的人，信不信由你！又更自恃有兩分傲氣，總以為有麝自然香，最憎拋頭露面去攀關係搞應酬。再講俗語有云，人怕出名豬怕肥，我一直以為做名人經常要面對公眾，所以要做好榜樣，做事說話都必定要謹慎，以免予人口實，承受那麼大的壓力很是辛苦。我自問口沒遮攔人豬合一，寧願食少多覺瞓，關起門來自家當個土皇帝逍遙算吧了！
但自見上周六「名人」幟哥在機場發惡，國泰都要即時跪低的報道，才知所謂「名人」完全不是我心目中以為的那回事！從中我得到啟發，我覺悟了！逐見獵心喜，眼見心謀，的起心肝誓做名人！
不能小看的，還有蘋果的威力，蘋果一出，現金賠償即時四級跳，由一萬變四萬；原價萬三的經濟位身價即時暴漲，和八萬五的商務位睇齊。我話晒under蘋果payroll，直情是蘋果中人啦，若然加上名人身份，應該以頭等價計算才比得上我的身價。
越諗越覺自己死蠢又蝕底。我一家六口要是在場，本來量入為出的「計算遊」，以商務價計，馬上變成有二十四萬現金使費的「豪華遊」。若以頭等計，嘩嘩嘩！不得了，分分鐘成百萬。我們這一家決定，以後舉凡那裏有機場罷工，或暴風雪等天災或戰亂，機不可再失，一於立即去book國泰機！即使不cancel，亦肯定有delay，照辦煮碗搵蘋果，上港聞威完玩完收完錢，之後繼續為受傷心靈追討賠償，實在恨死隔籬。做名人多好！
張慧敏（COREsearchLtd）
mailto:[email protected]