皇家馬德里貴為「銀河艦隊」，教練表面上有大把錢買人，麾下又粒粒皆星，不過其實呢個帥位一啲都唔易做，呢幾年差不多年年換教練。摩連奴今季打破「傳統」續領皇馬，但係最近就爆出佢都意興闌珊，英國傳媒就爆，皇馬來季有兩個新教練人選，一個係現任德國教練路維，一個竟然係阿仙奴領隊雲格。
上屆歐聯贏過巴塞
由迪保斯基03年離開皇馬開始，皇馬幾乎年年換教練，基羅斯、卡比路、蘇斯達等做過客，摩連奴10年接手後，上季攞番個西班牙盃，今季都叫做仲有得撈；不過呢排「寸王」負面新聞多籮籮，包括因為偏幫葡萄牙同鄉比比，搞到同卡斯拿斯、沙治奧拉莫斯等本土幫唔妥，對巴塞嘅西盃8強次回合賽前，仲晦氣咁講：「我都唔知下季仲係唔係皇馬教練？」
皇馬高層梗係唔會坐以待斃，搵定接班人，英國《每日郵報》報道，皇馬有兩個目標，其中之一係德國國家隊教練路維，佢教德國都有板有眼，08歐國盃亞軍、10世界盃季軍都算中上戰績，皇馬陣中又有奧斯爾同基迪拉，夠同聲同氣。另一個目標就好冷門，就係雲格嘞！
其實09年皇馬已經想搵雲格，不過「教授」唔理佢；阿仙奴呢幾年歐聯對巴塞雖然都被食住，但亦叫做有得贏吓，好似上屆歐聯主場贏巴塞2:1，次回合先輸1:3出局；皇馬都係一心搵個可以贏巴塞嘅教頭啫。不過，雲格自96年接手阿仙奴，擁有豐功偉業又唔怕被炒，有咩理由離開倫敦？只怪阿仙奴會方衰孤寒，見錢開眼將主力好似法比仔、拿斯尼都賣走，如果連尹佩斯都留唔住，雲格更加㷫。以皇馬嘅財力，雲格去到玩巨星又得，玩幼齒又得，唔怕冇錢使。不過我求大俠認為，62歲嘅雲格對阿仙奴有深厚感情，睇嚟走嘅機會唔高。
張伯倫：領隊奉獻好多
另外，雲格周日懷疑調動失當，收起大勇嘅翼鋒阿歷士張伯倫，換入艾沙維，結果輸畀曼聯1:2。不過18歲仔嘅張伯倫就冇發老脾，張伯倫話：「領隊為球會奉獻好多，希望球迷對佢有信心。」而張伯倫呢場嘅表現，亦都打動英格蘭領隊卡比路，有機會獲召為國家隊大軍㖭！