眾所周知農曆年初二是車公誕，不過香港人已經因俗習常於年初三赤口跑去拜車公。現今疫症如禽流感、豬流感、退伍軍人症等一籮籮輪流上場，大家當然更踴躍找遏止疫症有功的車公幫手求平安。不過記住今日上香前先拜西再拜東南，為新一年迎財接喜，新城DJ帶頭為大家逐一示範步驟。
記者：許維雅
攝影：周旭文
鳴謝：華人廟宇委員會、玄學術數師吳佩孚師傅
車公爺爺初二生日
好多人只知沙田車公廟，亦只知初三拜車公，但其實一年有幾日車公誕，拜車公亦唔止得一個地方，皆因車公都有分阿爺阿仔同阿孫。有傳車公是護駕南下香港的南宋名將，因中途病死，村民為表彰車公忠心遂建廟供奉，那廟正是西貢蠔涌車公古廟。沙田車公廟的出現，則沿於明末崇禎年間疫症肆虐新界，村民翻查史書發現宋朝有一位車大元帥不單止平亂有功，仲有遏止疫症的能力，於是沙田村民向西貢村民借來車公孫兒神主牌坐鎮沙田，三日後瘟疫果然消失，村民立刻建廟及打造車大元帥像答謝神靈。所以車公誕，其實正月初二是阿爺生日、六月初六是阿仔、八月十六是阿孫，至於三月廿七的車公誕，吳師傅認為只是因俗習常而生。拜車公最有利經商、政府公職及身體健康等願景的善信參拜。香港人習慣初三拜沙田車公，全因初三赤口不宜拜年，而沙田車公廟名氣亦較大，慢慢變成習俗而已。
年年拜開的善信當然知道拜車公的步驟，但大家總希望找個好時辰、好方位、準備充足去拜神求順利。第一次拜的，就更加要記清楚每個步驟。所以有請吳佩孚師傅引路，再由新城DJ杜浚斌（Ben）、胡凱澄（阿ME）及盧頌恩（妹頭）齊齊走一轉示範。
衣着篇：宜黑忌綠
今日初三是乙酉日，拜神穿金銀、黑白色較旺，避忌穿綠色及有花草樹木圖案的衣飾。所以今日出發前要揀好顏色衫，也切勿衣着暴露，吳師傅：「女士愛着短裙，但最好着番條褲啦！」
搭車篇：向大圍B站走
車公廟旁的錶位今日會被封，加上人流車流極多，最好搭公共交通工具前往，搭港鐵自然是不二之選。雖然馬鞍山線有一個車公廟站，但最近車公廟正門的港鐵站是大圍站，由大圍B站出口向左手邊行約5至10分鐘即到，不過今日警方會控制人流，龍尾應該由行人隧道開始排，大家記住睇清楚警方指示。若然堅持驅車前往，對面新翠邨有停車場，假日每小時$13，不過好大機會大排長龍，早些排隊免過吉時，另外大圍車站旁有爛地停車場，平時每小時$12，不過就唔包保今日會唔會加價。
今日最佳拜神的時辰是辰時（即上午七時至九時）及申時（即下午三時至五時），計好時間出發喇。
祭品篇：三牲祭品隨心
香燭車公衣寶可出發前準備，在車公廟門口買亦可，香燭衣寶大小，量力隨心便可。若想用祭品拜祭顯誠意，可之前買定三牲及生果鮮花，吳師傅：「三牲即豬、雞鴨及魚，較多人用燒肉及雞拜神，魚就以魚形年糕代替較方便。」不過簡化一點買燒肉及生果已足夠，「其實車公衣寶已包括壽金，即神仙用的錢，畀車公自己買嘢食，無祭品亦無妨。」
拜神步驟
（一）點香添香油
上香前先洗手，這是禮貌。之後便可到兩旁的點香區排隊，廟內嚴禁自行生火點香，有工作人員會幫手點香，更會幫善信於衣寶上寫上姓名。點香區放了一本名冊，善信可順手寫名添香油作福，香油隨心便可。
（二）上香前拜三方
點完香可到大殿前的香爐區上香，先上三支大香，上香前可先當天拜兩拜迎喜神，當日最佳方位是正西財神位，即背向廟、面向新翠邨拜一拜求財，然後向東南喜神位，即面向廟，廟的右方便是東南方再拜一拜。最後再面向車公大殿廟前正壇拜完上香。稟神時避免出言不敬，向車公稟明姓甚名誰、出生日期及今年所想所求便可。上完大香，細香可上於其他香爐，唔好唔記得門口旁的福德祠，即土地公公，亦要記住留番三支細香帶入正殿。
（三）左腳先踏入廟
之後可帶三支細香進入廟內，吳師傅提醒大家入殿記得以左腳行先，因為左為陽，有第一的意思。香港現在大部份廟宇為安全起見已嚴禁化寶，那份車公衣寶可放入聚寶車，求安心的可自行帶回家化，只要當天化便可。
（四）敲鼓求精神爽利
好多人都知拜車公的另一習俗是敲鼓轉風車，上完香便可轉風車祈求新一年順順利利，男左手女右手，以順時針方向轉動便可。坊間有傳敲鼓是向車公報到，吳師傅則認為菩薩一定知你係邊個，敲鼓只是求精神爽利有助消災抗病。
（五）求籤指迷津
求籤視乎善信意願，有事問可到解籤處以按金$20借籤筒，再到廟內左方求籤區求籤，$5一張籤紙，解籤則$10一支。吳師傅話車公籤較特別，只得九十六支，無煩惱亦可求支家宅平安籤。
（六）風車記得過火
最後好多善信都喜歡買個大風車返屋企，不過記住拎個風車於香爐上面左轉三下，右轉三下，這叫「風車過火」，將旺氣帶回家，以保全家順風順水。
新增財神殿
去年廟內新增設右邊的「福祿宮」（即「財神殿」）及左邊的「元辰殿」（即「太歲殿」）。財神殿供奉了斗姥元君，殿右邊有招財燈、左邊有富貴燈，每個月$380，亦可買財神福袋$80，袋內有財神金、利是糖、檀香及財神符。太歲殿則供奉了六十個太歲，今年犯太歲者包括本命龍、冲狗、六害兔、及龍虎相爭的虎年者可攝太歲，太歲福袋及衣寶每份$80。
開光葫蘆求健康
門口旁邊有很多開了光的紀念品，包括金風車、匙扣及手鏈等，吳師傅：「傳統之說，葫蘆有化病之效，體弱多病一族不妨買番一個返屋企睇門口。」
車公有禮
為慶祝兩個新殿落成，華人廟宇委員會今年預備了開光太歲符及五路財神貼紙贈予善信保平安。此外，新春期間於太歲殿作任何捐獻即可獲贈「斗姥元君」八達通套，開光贈品數量有限，送完即止。
車公廟初三開放時間：
初二開始通宵開放至今日（2月5日/初三）下午5時30分