林建岳前女友、名媛陳浥萍（Monica）近年會返回娘家台灣過新年，今年買了101利是封、台灣水果、好友葉蘊儀做的糖環過年。她早前和一班台灣好友開新年主題派對，Monica以清朝抱狗美女造型，成功贏了獎金12,000元的最佳衣着獎。
陳浥萍在台灣開古董喱士店、香港開藝廊、茶館，經常港台兩邊走。早前她與台灣好友搞一年一度cosplay聚會，今年以中國古裝為主題，Monica以最愛的台灣設計師夏姿的大紅長袍赴會，出門前先款待台灣朋友，抱住愛犬合照，如同一幅清朝古董畫，最後更勝出最佳衣着獎。她說：「都係玩吓，每年一次，去年係馬甲主題、前年係歐洲古董裝，今年就係中國風。我哋12個朋友，每人貢獻一千蚊，頒畀着得最落力嗰個。」
Monica誕女後，一直在香港過年，去年開始返回娘家台灣過：「呢兩年都返台灣，幾懷念台灣嘅新年，可以放天燈，好似《那些年》咁，又可以燒炮仗，玩仙女棒（手持的煙火）。香港過新年，人好多，但都係喺shoppingmall入面，冇乜空間，台灣可以去老街逛街，去九份食湯丸，買手工藝品。」Monica謂小時會一家人圍爐守歲，很窩心溫馨：「成班女仔喺auntie度排隊𢭃利是，排完又去龍尾再排，排幾次，直到被大人發現，好好笑。」
派雙封利是
講開台灣新年習俗，香港人派利是分單雙封，台灣人一律派單封，Monica則愛開雙：「覺得雙雙對對，特別有意思，今年係台灣民國101年，所以特別買咗好多101嘅利是封。」談到新年大計，在半山開了家品workshop後，Monica計劃開拓茶葉市場：「過完年會去斯里蘭卡睇茶，會住喺茶園入面8至10日，睇茶園、品茶，因為會出自己品牌嘅茶葉。」
採訪：林妙萍
攝影：葉君海