每逢大年初三，除咗係傳統赤口之日、不宜拜年，原來今日仲係農曆新年嘅賽馬日，正所謂「年過年，關過關，財來運起年初三」！玄學師方海閱教路，如果想旗開得勝，逢賭必贏，謹記身穿大紅大紫又或者橙色衣物，當然最好再配合吉利嘅方位、時間以及飾物，財運自然來！
記者：陳國輝
攝影：陳盛臣
Model：Candy、Edwin&[email protected]
鳴謝：玄學家方海閱師傅
八白財星飛南方
如果打算今日親身走去沙田馬場發個新年財，師傅話，衣服顏色方面首選為紅色，紫色次之，第三就係橙色！佢解釋，由於大年初三係乙酉日，「乙」屬木，而木生火，火就代表紅色嘅意思；至於「酉」則屬金，由於火剋金，因此紅色有取金之意。
如果穿到一身紅色進入馬場，似乎有啲誇張。師傅話，其實唔一定穿上某種單一顏色，只要身上衣服帶有紅、紫以及橙三色嘅混合配搭，就可幫助大家趨運！
除咗顏色，選擇方位亦好重要。師傅教路，今日以正南方為最佳財位，東北位則次之；佢解釋，由於結合正財、橫財與偏財嘅「八白財星」會飛向南方，表示向南嘅財運最強，至於另一種代表偏財嘅「七赤財星」則會飛向東北方，表示東北方屬於偏財運較佳嘅位置。但必須留意，如果打牌或進入投注站，當然可選擇南方或港島南區等位置，但由於沙田馬場嘅入口以及座位，均面向東南方，咁就有可能跟師傅提及嘅方法有牴觸；但師傅補充，若然能配合下列其他有利條件，也可助趨運。
天喜之時宜落注
雖然馬場入口同埋座位方向，我哋無得選擇，但想進入邊一個投注站落注，大家就可以慢慢揀。由於「八白財星」利正南，除咗有利港島南區嘅投注站，最好配合從南方正門口進入，效果就更理想。但大家切忌揀正西位置，師傅解釋，由於今日仍然未過立春（二月四日），因此向西屬於三煞位，絕對不利正財或偏財。
至於最適宜進入馬場嘅時間，師傅話中午十二時至一時呢段時間都最理想；不過，最佳投注時間就要去到下午三點至五點先係最佳時機。佢解釋，因為三至五時屬於「天喜」之時，亦即係吉時，所以好適宜落注；但如果大家錯失咗呢段最佳「落飛」時間，不如約埋朋友喺呢段時間打牌，食盡三家茶禮！
馬會初三賽馬日特別安排
＊ 上午10:30am進場 ＊麥玲玲龍年開運講座 ＊舞龍醒獅滙演
＊ 入場人士免費獲贈「招財筆」一支（先到先得）及
「龍年頭彩擦擦卡」一張（有機會獲得24K包金運貼馬一隻）
貔貅黃水晶旺財
除咗身穿大紅大紫，或者橙色嘅衣衫，開賭前大家也不妨穿戴可帶來旺氣嘅飾物！方師傅話，黃色玉造嘅貔貅飾物最旺財，因為貔貅係龍生九子之一，佢除咗具有龍馬精神嘅意思之外，更重要係因為貔貅沒有屁股，咁表示財運有入無出嘅意思，尤其能吸引偏財，所以開賭之前戴住黃色玉造嘅貔貅飾物，最能夠助你趨運。
另一種師傅建議佩戴嘅飾物，就係黃色水晶鏈，例如頸鏈、手鏈都無問題。佢解釋，除咗水晶本身係礦物質，有利財運之外，黃色水晶更具備王者之風、神光普照嘅意思，呢類飾物都有利偏財。
開賭宜忌
宜
1.顏色：首選紅，次選紫，三選橙
2.方位：首選南，次選東北
3.飾物：玉造貔貅、黃色水晶
4.時間：十二至一點（入場）、三至五點（落注）
5.幸運數字：「5」、「8」
6.麻雀：索子（綠色）
忌
1.忌西位
2.不要洗頭
3.不要冲凉
4.不要做愛
5.不要鬧交
6.不利數字「3」
開賭前勿洗頭冲凉
有時候，夾唔啱最有利時間，或者適當方位都唔緊要，但有啲禁忌事情，就盡量要避免！方師傅指出，第一大忌係開賭當日洗頭及冲凉，佢解釋，由於額頭主火，一旦洗頭就會失去咗呢道火，相等於趕走旺氣，財氣自然也不會來，加上年初三屬於赤口，也不適宜洗頭。其次係不要做愛，否則會蝕旺氣，不利財運；其三係不要鬧交，因為衝動容易影響情緒，心情差自然運氣也相應變壞。
方師傅仲話，特別係打麻雀嗰陣，坐嘅位置最好不要背向廁所，同時也不要有人在身後行來行去，因為咁樣亦會影響情緒，不利偏財運。
手機Apps照開賭
過年行個橫財運有邊個唔想！其實唔玩真金白銀、唔入馬場、唔約朋友打牌，照樣也可賭得開心，講緊係iPhone以及Android手機賭博Apps，只需單撈落手機，就算你身在屋企，照可開賭！
《賭神之戰─麻將》
類似經典麻雀遊戲《明星三缺一》，港式十三隻牌玩法，有十位當紅超級巨星，例如劉華、周董以及曼玉等將會同你決戰四方城，更有三種難易度隨你選擇，過新年夠玩。（iOS，0.99美元）
《紅龍賭場：21點》
無時間過大海，但總有時間用手機單撈呢個App，走入呢個虛擬賭場！除咗有最多人玩嘅21點，「賭場」內仲提供角子老虎機以及大輪盤，只可惜類種太少。（Android，免費）
《為新年作好準備（魚蝦蟹篇）》
買定離手喇！小時候玩魚蝦蟹都玩得多，但自己做莊真係未試過，呢隻Game畀你當iPhone係骰盅咁搖，唔單止感覺真實，骰仔嘅SoundEffect仲好清脆㖭！（iOS，免費）
《足球-賠率速遞》
講到開賭，賭波似乎更深受年輕朋友歡迎！呢款App除咗提供即時賠率走勢及變化，助你分析落注之外，更有詳細球隊往績以及預測賽果，24小時不停更新，超快！（iOS，1.99美元）
《六合彩計算機》
連六合彩都有得計算機會率？無錯，呢款App除咗將中過嘅號碼，統計完再計算出機會率外，仲可以幫你設定一組「心水」六合彩號碼，無頭緒者不妨搵佢幫手。（Android，免費）
《大，小（澳門式）》
屋企過年「孖寶」，除咗一班親朋齊齊玩嘅魚蝦蟹，梗唔少得超經典買大細！你仲可以選擇買單一號碼、買總和，甚至乎圍骰，但今次唔係做莊，只係做閒。（Android，免費）
《賭神搓牌》
睇見賭神一邊食朱古力，一邊玩搓牌特異功能，你係咪好想學埋一份？呢個App唔單止將手機由葵扇A變成紅心A，仲配合埋賭神嘅配樂，喺朋友前表演，爆笑！（Android，免費）
《超激戰骰子樂－賭神骰盅》
咪以為喺賭桌上搖吓骰仔就算，其實你可以搵埋其他朋友一齊裝呢個App，然後當正大話骰咁玩；當然，你仲可以只係玩三粒骰，最多五粒骰，任你發揮。（iOS，免費）
