新年前到馬場,碰到馬主C,問佢隻馬有冇機會,佢話:「CY有冇機會吖?」左丁山不虞有此一答,窒咗一窒,即刻睇吓馬簿,係噃,嗰場有隻8號大熱門,馬主C確係好難贏到頭馬嘅,佢既然咁講,索性問埋:「亨利有冇機會呀?」馬主C答:「亨利咪係8號囉。」哦,十五分鐘後已有賽果,8號順利跑第一,馬主C隻馬跑第二,一條單Q雖然派彩不多,中咗梗係好過冇中,如果係咁嘅話,競選特首跑馬仔又係亨利CY單Q啫,問題係邊隻馬行頭,第三隻馬阿爾拔何一定係輸一條街,可以慢慢行番嚟。
後來在廂房碰到地產E,佢最鍾意小注怡情,話用過隻九十九倍嘅「天光明」做膽,中咗四連環八千元,笑到見牙唔見眼,左丁山聽到,唯有唉聲嘆氣,地產E話:「天光明走咗光咯,下次再出,冇九十九倍嘅嘞,不過我既然贏開,隻馬再出嘅話,一定再用佢做四連環馬膽,希望再收八千!」認真大想頭,走光馬再出,易成眾矢之的,冇咁容易放得出頭,跑前四名未必咁易,左丁山就好少有咁嘅馬運,向佢轉述馬主C之言,問佢點睇,地產E話:「馬主C代表好多商界人士嘅諗法,亨利目前係大熱門,CY除非在最後一分鐘着啡燈落飛,否則難以睇好。(按:着啡燈係馬場術語,有一隻馬嘅賠率急速滑落,譬如由二十倍急跌到五倍嘅話,馬場電腦屏幕會用顏色轉變來促請馬迷注意。)」
隻馬嘅賠率着啡燈就容易睇到啫,競選特首着啡燈就好難得見,大注落飛之人只會有一個,就係來自黨中央,唔,睇吓會唔會在三月二十號之後吹雞?地產E以前有參加市建局嘅舊區重建計劃,問佢市建局的新樓點解賣得咁貴,係唔係地產商要食埋市民隻車?地產E話:「我地唔敢公開嗌寃枉嘅,市建局對新盤呎價,極度進取,講明不能賤賣,我地與市建局為咗訂價,講到口水乾,終於都係市建局贏,貴價到銷情呆滯先至再講過,我地大老闆話,每一位地產商同市建局合作一次就夠嘞,唔好再玩第二次!」原來市建局咁巴閉,地產商都怕咗佢,果然威名遠震,夠遠夠長。