最近傳年屆47歲嘅溫兆倫同內地演員趙庭展開第三段婚姻，仲話就快做人爸爸。但聽講另有內情，佢同第二任妻子潘燕妮（Winnie）其實一直未離婚，Winnie日前接記者電話時支吾以對話：「我整緊嘢，唔同你傾咁多嘞！我好busy，唔好意思。」然後就cut咗線。
女友自稱有餡
新正頭，溫兆倫又回復「發瘟」本性，年廿九晚喺微博發咗一段好「惡毒」嘅新春賀年說話：「給所有轉播謠言的人發紅包，紅包裏有『報應』和『去你的』幾個字。我承認很希望生小孩，但是今年不可能！」唔知發瘟同趙庭係咪未達成共識，兩個人擺明玩嘢，發瘟呢頭話各走各路，約兩個鐘後，趙庭又喺微博晒幸福：「感恩是人生不可缺少的，我能開開心心地走到今天，首先感謝我的父母，還有……他，他們給我的愛是全部的是無私的，如今一家人的快樂四人行是上天注定的，我感恩。接下的希望是：快樂五人行！」
之後發瘟就喺呢段留言上加咗句：「以下的文字內容就讓各位感興趣的媒體去轉發吧，讓他們多賺點錢，過個好年吧！」睇嚟仲有手尾跟。
