李嘉欣舊愛、男模陳平治（Perry）早年已轉投商界，甚少在公開場合露面，久違了的他日前單拖現身銅鑼灣，暴脹身形與當年弗爆體態判若兩人，他卻抵賴生意應酬致肥。Perry表示自己仍未結婚，已沒聯絡李嘉欣，二人再見不是朋友。
曾跟大美人李嘉欣於98年拍拖的靚仔男模陳平治，這段姊弟戀只維持了僅半年便玩完，李嘉欣現已擁有幸福家庭，嫁了富商許晉亨後還育有可愛囝囝JaydenMax，不過舊愛Perry卻仍孤家寡人。日前本報記者撞見Perry單拖現身銅鑼灣執中藥，當年身形健碩的型男，自退出模界轉投商界後，已開始中年發福。
長髮剪短
想當年青靚白淨、身形弗爆的Perry是模界筍盤，但自退出模界後，體形漸向橫生，當日他身穿黑色汗衣、背心及藍色牛仔褲，佬味甚濃，昔日胸肌及腹肌全部失去蹤影，身形暴脹兩個碼，一頭瀟灑長髮也剪短，驟眼看像倒模自未修身前的肥版陳子聰！
脹爆Perry在藥店外來回踱步，其間不時無聊把玩手機，又打電話與友人吹水解悶，最後拿了兩大包藥材離開。雖然藥店隔鄰是台式珍珠奶茶店，Perry眼望望想幫襯，但未知可是怕胖而忍口作罷。
否認睇病
記者前晚致電Perry，他表示近年營商，不時返內地洽談鋼鐵生意，應酬兼夜蒲致身形暴脹，他說：「嗰日我啲朋友嚟咗香港，我帶佢哋去買嘢，佢哋睇嘢，我咪幫佢哋去攞番啲藥囉，唔係我病去執藥。」對於發福，Perry解釋：「仲可以啫，我新剪咗短髮，睇落去可能肥少少。」問到還有聯絡舊愛李嘉欣嗎？Perry說：「冇啦。」問Perry是否已婚時，他揚言現在仍是單身。
採訪、攝影：羅德光、比華利