唔少人喺年初二會同家人親戚朋友一齊食開年飯，其中汪明荃（阿姐）同羅家英都唔例外，噚日約齊好友親朋一齊食飯。一向好鍾意玩微博嘅阿姐仲將食開年飯嘅相貼上網，相中見阿姐着到紅彤彤，相當應節，而天氣咁凍，家英哥梗係要戴番頂冷帽保暖，千祈唔好凍親個頭，阿姐就不忘留言祝大家一句：「豐衣足食！」